काठमाडौँ । श्रम संस्कृति पार्टीका सांसद हर्क साम्पाङले प्रधानमन्त्री बालेन शाहलाई सदनमा उपस्थित गराउन सभामुख डीपी अर्यालले रुलिङ नगरेको भन्दै प्रतिनिधि सभाको बैठक बहिस्कार गरेका छन् ।
बुधबार बसेको प्रतिनिधि सभाको बैठक सुरु हुनेबित्तिकै साम्पाङले प्रतिनिधि सभा नियमावली, २०७९ को नियम ३१ को उपनियम (१) बमोजिम आफूलाई बैठकबाट बाहिर निकाल्न वा प्रधानमन्त्री बालेन शाहलाई संसदमा उपस्थित गराउन सभामुखसमक्ष रुलिङको माग गरेका थिए ।
तर सभामुखबाट कुनै रुलिङ नभएपछि साम्पाङ झोला बोकेर आफैँ बैठक कक्षबाट बाहिरिएका थिए ।
यद्यपि, उनले बैठक बहिस्कार गरे पनि श्रम संस्कृति पार्टीका अन्य सांसदहरूले भने बैठक बहिस्कार नगरी संसदको कार्यवाहीमा सहभागी भएका थिए ।
