काठमाडौँ। राष्ट्रिय सहकारी बैंक लिमिटेडको सञ्चालक समिति तथा लेखा सुपरिवेक्षण समितिको निर्वाचनका लागि छ प्रदेशका सञ्चालक निर्विरोध निर्वाचित भएका छन् ।
निर्वाचन समितिका अनुसार लेखा सुपरिवेक्षण समितिमा एक जना संयोजकसहित दुई सदस्य पनि निर्विरोध निर्वाचित भएका छन् ।
बागमती प्रदेशतर्फको सञ्चालक पदका लागि भने यही जेठ ९ गते निर्वाचन हुने कार्यक्रम तय गरिएको छ ।
बागमती प्रदेशको सञ्चालक पदका लागि सङ्घीय संसद्मा प्रतिनिधित्व गर्ने प्रमुख प्रतिपक्षी दलसहित तीन दलले साझा उम्मेदवार घोषणा गरेका छन् । उनीहरूले डा. परितोष पौडेललाई साझा उम्मेदवारका रूपमा अघि सारेका हुन् ।
उम्मेदवार घोषणा कार्यक्रममा नेपाली कांग्रेसका केन्द्रीय सदस्य गीता सत्याल, एमाले नेता केशव बडाल, खगराज अधिकारी, खेमप्रसाद लोहनी तथा नेकपाका सचिवालय सदस्य लीलामणि पोखरेललगायतले सहकारी अभियानलाई मूल्य–मान्यताअनुसार सञ्चालन गर्नुपर्नेमा जोड दिएका थिए ।
राष्ट्रिय सहकारी महासंघका कार्यवाहक अध्यक्ष रमेश पोखरेल र उम्मेदवार पौडेलले सहकारी अभियानलाई पारदर्शी, जवाफदेही र जिम्मेवार रूपमा अघि बढाउन साझा घोषणापत्र तयार गरी सार्वजनिक गरिने जानकारी दिए ।
बागमती प्रदेशको सञ्चालक पदका लागि मतदान भने सातै प्रदेशका प्रतिनिधिहरूले गर्ने व्यवस्था गरिएको छ ।
