काठमाडौँ । सञ्चार तथा सूचना प्रविधिमन्त्री डा. बिक्रम तिमिल्सिनाले सरकारी निकाय तथा सार्वजनिक संस्थाहरूको संस्थागत क्षमता विकासमार्फत नागरिकलाई सहज, छरितो र प्रभावकारी सेवा प्रवाह सुनिश्चित गर्नु सरकारको उच्च प्राथमिकतामा रहेको बताउनुभएको छ ।
सार्वजनिक सेवा प्रसारण, रेडियो नेपालको ७६औँ वार्षिकोत्सवका अवसरमा आयोजित कार्यक्रममा सम्बोधन गर्दै मन्त्री तिमिल्सिनाले संस्थाहरूलाई बलियो, जवाफदेही र परिणाममुखी बनाउने दिशामा मन्त्रालय नयाँ ऊर्जा र गतिका साथ अघि बढिरहेको स्पष्ट पार्नुभयो ।
उहाँले बलियो संस्थागत संरचना बिना नागरिकले गुणस्तरीय सेवा पाउन नसक्ने उल्लेख गर्दै मन्त्रालयले संस्थागत सुधारलाई नयाँ ढङ्गले अघि बढाइरहेको बताउनुभयो । उहाँका अनुसार सरकारका निकायहरू सक्षम र उत्तरदायी बने मात्र सेवा प्रवाह प्रभावकारी बन्न सक्छ ।
मन्त्री तिमिल्सिनाले हालको राजनीतिक तथा प्रशासनिक संरचनामा देखिएका नकारात्मक प्रवृत्तिलाई सुधार गर्नुपर्ने आवश्यकता औँल्याउँदै देशले खोजिरहेको दिशा पहिचान गरी त्यसअनुसार रूपान्तरण आवश्यक रहेको धारणा राख्नुभयो । उहाँले राजनीतिक मूल सुधारसँगै सबै संस्था र नागरिकले आ–आफ्नो जिम्मेवारी पूरा गर्नुपर्ने समय आएको उल्लेख गर्नुभयो ।
उहाँले जवाफदेहिता र अनुशासनमा कुनै सम्झौता नहुने स्पष्ट पार्दै कमजोरी देखिए कारबाही हुने चेतावनी दिनुभयो । सेटिङ र अनियमिततामा संलग्न हुनेहरूलाई कानुनी दायरामा ल्याउन सरकार सक्रिय रूपमा काम गरिरहेको उहाँको भनाइ थियो ।
त्यस अवसरमा मन्त्री तिमिल्सिनाले सरकारी खर्चमा मितव्ययिता अपनाउनुपर्नेमा जोड दिँदै अनावश्यक खर्च नियन्त्रण, प्रभावकारी सूचना सम्प्रेषण र सुशासनबीचको सम्बन्धलाई सुदृढ बनाउनुपर्ने आवश्यकता औँल्याउनुभयो । साथै आगामी पाँच वर्षभित्र युवालाई विदेशिनु नपर्ने अवस्था सिर्जना गर्ने लक्ष्यमा सबै नागरिकको समान जिम्मेवारी रहने उल्लेख गर्नुभयो ।
लोकतान्त्रिक व्यवस्थामा सूचना नागरिकको मौलिक अधिकार भएको उल्लेख गर्दै मन्त्री तिमिल्सिनाले सार्वजनिक सेवा प्रसारण संस्थाहरूले त्यसको संरक्षण र प्रवर्द्धन गर्नुपर्ने बताउनुभयो । बदलिँदो प्रविधि, बजार प्रतिस्पर्धा र दर्शक–श्रोताको चाहनालाई ध्यानमा राख्दै सार्वजनिक सेवा प्रसारणलाई अझ प्रभावकारी, विश्वसनीय र जनमुखी बनाउनुपर्ने उहाँको भनाइ थियो ।
आफ्नो विद्यार्थी जीवन सम्झँदै उहाँले रेडियो नेपालले आफूलाई साहित्य लेखनतर्फ प्रेरित गरेको उल्लेख गर्दै सार्वजनिक सेवा प्रसारण संस्थाहरू समाज निर्माणमा दीर्घकालीन प्रभाव पार्ने माध्यम भएको धारणा राख्नुभयो ।
