काठमाडाैँ । मध्यपूर्वमा जारी द्वन्द्वका कारण सिर्जित आर्थिक तथा वित्तीय चुनौतीहरू सामना गर्न एशियाली विकास बैंक (एडीबी) ले आफ्ना विकासोन्मुख सदस्य राष्ट्रहरूका लागि विशेष सहायता प्याकेजको घोषणा गरेको छ ।
अर्थतन्त्रहरूमा परिरहेको तत्कालको चुनौतीहरु व्यवस्थापन गर्न र दीर्घकालीन रुपमा ती देशको अर्थतन्त्रलाई मजबुत बनाउन एडीबीले प्याकेज घोषणा गरेको हो ।
बैंकका अध्यक्ष मासातो कान्डाले प्याकेजमार्फत सदस्य राष्ट्रहरूलाई द्रुत रूपमा वितरण हुने बजेट सहायता र अत्यावश्यक वस्तुहरूको आयात सुनिश्चित गर्न सघाउ पुग्ने बताए ।
उनकाअनुसार व्यापार तथा आपूर्ति श्रृंखलालाई सहज पार्न वित्त व्यवस्था उपलब्ध गराइनेछ । विशेष गरी इन्धनको मूल्यमा भएको भारी वृद्धिलाई सम्बोधन गर्न विभिन्न देशका लागि विश्व बैंकले वित्तीय सहयोग उपलव्ध गराउने गर्ने निर्णय गरेको उनले जानकारी दिए।
एडीबीकाअनुसार मध्यपूर्वको तनावका कारण ढुवानी मार्गहरूमा अवरोध आउँदा लागत र समय दुवै बढेको देखाएको छ । यसको प्रत्यक्ष असर ऊर्जा क्षेत्रमा मात्र नभई औद्योगिक कच्चा पदार्थ, पेट्रोकेमिकल्स र रासायनिक मलमा समेत परेको छ, जसले गर्दा कृषि र खाद्य उत्पादनमा गम्भीर संकट आउन सक्ने चेतावनी बैंकले दिएको छ । साथै, पर्यटन र रेमिट्यान्समा निर्भर रहने मुलुकहरूले मुद्रास्फीति र वैदेशिक मुद्रा सञ्चितिमा थप दबाब खेप्नुपर्ने अवस्था सिर्जना भएको छ ।
यस्तो विषम परिस्थितिमा समष्टिगत आर्थिक स्थिरता कायम राख्न बैंकले आफ्नो ‘काउन्टरसाइकलिक सपोर्ट फेसिलिटी’ मार्फत सहुलियतपूर्ण ऋण उपलब्ध गराउनेछ । यसले सरकारहरूलाई वित्तीय घाटा कम गर्न र लक्षित वर्गको जीविकोपार्जनमा परेको प्रभाव न्यूनीकरण गर्न मद्दत पुग्ने विश्वास लिइएको छ ।
अध्यक्ष कान्डाका अनुसार, बैंकले गम्भीर रूपमा प्रभावित भएका सदस्य राष्ट्रहरूसँग तत्काल आवश्यक सहयोगबारे छलफल सुरु गरिसकेको छ । ६९ सदस्य राष्ट्र भएको यस बहुपक्षीय विकास बैंकले निजी क्षेत्र र अन्य विकास साझेदारहरूसँग मिलेर गरिब तथा जोखिममा रहेका समुदायको सुरक्षाका लागि एकीकृत रूपमा काम गर्ने प्रतिबद्धता जनाएको छ ।
