काठमाडौ। निर्वाचन आयोगले भोलि हुने प्रतिनिधिसभा सदस्य निर्वाचनको मतगणना सुरु भएको २४ घन्टा भित्रै प्रत्यक्ष तर्फको मतगणना सार्वजनिक गर्न सकिने दाबी गरेको छ ।
आज भएको पत्रकार सम्मेलनमा कार्यवाहक प्रमुख निर्वाचन आयुक्त रामप्रसाद भण्डारीले मत गणना सुरु भएको २४ घन्टा भित्रै प्रत्यक्ष तर्फको मतगणना सम्पन्न गरिने जानकारी दिएका छन् । उनले त्यसलगत्तै समानुपातिक तर्फको मतगणना पनि सुरु गर्ने बताए।
यस निर्णयका लागि निर्वाचन आयोगले १६५ निर्वाचन क्षेत्रलाई नै परिपत्र जारी गरिसकेको जानकारी पनि उहाँले दिनुभयो । आयोगले मतगणना छिटो बनाउन प्राविधिक व्यवस्था गरेको जनाएको छ । मतगणना स्थलको सुरक्षाका लागि तारजाली र सिसिटिभी राख्ने काम सम्पन्न भएको आयोगले जनाएको छ ।
प्रमुख भण्डारीले भने,”पहाडी भूभागबाट मतपेटिका संकलन छिटो भन्दा छिटो गर्ने हाम्रो प्रयास हुन्छ । सम्भव भए हेलीबाट गरिन्छ । मतगणना सुरु भएको २४ घन्टामा मतपरिणाम पहिलो हुनेको प्रकाशित गरि सक्नेछौं । अनि त्यस लगत्तै समानुपातिकको पनि गणना सुरु गरिन्छ ।”
