काठमाडौँ । धादिङमा आइतबार राति भएको बस दुर्घटनाबारे गृह मन्त्रालयले औपचारिक छानबिन अघि बढाउने निर्णय गरेको छ।
ठूलो जनधनको क्षति भएका कारण मन्त्रालयले उच्चस्तरीय बैठक बसेर घटनाको तथ्यगत अध्ययन गरी प्रतिवेदन पेश गर्ने उद्देश्यसहित छानबिन समिति गठन गर्ने निष्कर्ष निकालेको हो।
बैठकमा गृहमन्त्री ओम प्रकाश अर्याल, भौतिक पूर्वाधार मन्त्रालयका सचिव, सडक विभागका महानिर्देशक, यातायात व्यवसायी महासंघका प्रतिनिधि, तीनवटै सुरक्षा निकायका प्रमुख तथा अन्य सरोकारवाला निकायका पदाधिकारीहरूको सहभागिता रहेको बताइएको छ।
प्रारम्भिक विवरण अनुसार पोखराबाट काठमाडौं आउँदै गरेको ग२ख १४२१ नम्बरको बस धादिङको बेनिघाट रोराङ गाउँपालिका–५ भैंसेगौडा क्षेत्रमा राति करिब १ बजे सडकबाट तल खसेर त्रिशूली नदी किनारमा पुगेको थियो।
दुर्घटनामा १८ जनाको ज्यान गएको पुष्टि भएको छ। घटनास्थलमै १७ जनाको मृत्यु भएको थियो भने उपचारका क्रममा एक जनाको निधन भएको छ। घाइतेहरूलाई विभिन्न अस्पतालमा उपचारका लागि पठाइएको छ। प्रहरीका अनुसार नेशनल अस्पतालमा १० जना, ट्रमा सेन्टरमा १५ जनामध्ये एक जनाको मृत्यु भएको र बाँकी १४ जनाको उपचार जारी रहेको छ।
