इस्लामाबाद। पाकिस्तानमा जनवरी सन् २०२६ मा श्रमिकहरूले विदेशबाट पठाएको रेमिट्यान्स तीन अर्ब पाँच करोड अमेरिकी डलर पुगेको छ, जुन अघिल्लो वर्षको जनवरीको तीन अर्ब अमेरिकी डलर भन्दा १५ प्रतिशत बढी हो ।
यद्यपि यो रकम डिसेम्बर २०२५ मा रेकर्ड गरिएको तीन अर्ब छ करोड अमेरिकी डलर भन्दा अलिकति कम हो । चालू आर्थिक वर्षको जुलाई २०२५ देखि जनवरी २०२६ सम्मको सात महिनाको अवधिमा जम्मा रेमिट्यान्स तेईस अर्ब दुई करोड अमेरिकी डलर पुगेको छ, जुन अघिल्लो वर्षको सोही अवधिको बीस अर्ब नौ करोड अमेरिकी डलर भन्दा उल्लेखनीय वृद्धि हो ।
देशमा पठाइएको रेमिट्यान्सको सर्वाधिक हिस्सा साउदी अरेबियाबाट आएको छ । त्यसपछि संयुक्त अरब एमिरेट्स बाट छ सय चौँसठ्ठी करोड अमेरिकी डलर र बेलायतबाट पाँच सय बहत्तर करोड अमेरिकी डलर प्राप्त भएको छ ।
अन्य युरोपेली संघका देशहरूबाट पठाइएको रकम चार सय अस्सी करोड अमेरिकी डलर पुगेको छ, जुन अघिल्लो वर्षको तुलनामा छतीस प्रतिशत ले वृद्धि भएको हो ।
यस वृद्धिले पाकिस्तानको अर्थतन्त्रमा सकारात्मक संकेत दिएको छ । विदेशमा काम गर्ने श्रमिकहरूको योगदानले देशमा विदेशी मुद्रा सञ्चित गर्न मद्दत पु¥याउँछ, जसले आयात–निर्यात सन्तुलन कायम राख्न, विदेशी ऋण भुक्तानी गर्न र देशको समग्र आर्थिक स्थायित्वमा सहयोग पु¥याउँछ ।
विशेषज्ञहरूका अनुसार, रेमिट्यान्सको यो वृद्धि पाकिस्तानको वित्तीय प्रणालीमा विश्वास र श्रमिकहरूको मेहनतको परिणाम हो ।
सरकारले यस प्रवृत्तिलाई प्रोत्साहित गर्न र श्रमिकहरूको सुविधाजनक पैसा पठाउने प्रणालीलाई अझ मजबुत बनाउन विभिन्न पहलहरू अघि बढाएको छ ।
यस प्रकारको निरन्तर वृद्धि भविष्यमा पाकिस्तानको आर्थिक सुधार र विदेशी मुद्रा सञ्चितिमा थप योगदान पु¥याउने अपेक्षा गरिएको छ । (रासस/सिन्ह्वा)
