काठमाडौँ । राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेमाथि लगाइएको अभियोग संशोधनविरुद्ध दायर मुद्दा सर्वोच्च अदालतमा पेश हुने भएको छ।
सर्वोच्च अदालतका न्यायाधीश अब्दुर अजीज मुसलमानको एकल इजलासमा उक्त मुद्दाको पेशी तोकिएको हो। मुद्दा मुसलमानको इजलासको ‘ग’ नम्बरमा राखिएको छ।
लामिछानेमाथि लगाइएको सम्पत्ति शुद्धीकरण तथा संगठित अपराधसम्बन्धी कसुरको मुद्दा यसअघि महान्यायाधीवक्ता कार्यालयले संशोधन गरेको थियो। सो संशोधनविरुद्ध लामिछाने पक्षबाट सर्वोच्च अदालतमा मुद्दा दायर गरिएको हो।
केपी शर्मा ओली नेतृत्वको सरकारका पालामा लामिछानेविरुद्ध सहकारी ठगीसँगै संगठित अपराध र सम्पत्ति शुद्धीकरणसम्बन्धी मुद्दा दायर गरिएको थियो। रास्वपाले ती मुद्दाहरूलाई राजनीतिक प्रतिशोधका रूपमा लिँदै आएको छ।
हाल महान्यायाधीवक्ता कार्यालयले सहकारी ठगी प्रकरणमा रवि लामिछानेसहित अन्य प्रतिवादीमाथि दायर गरिएको सम्पत्ति शुद्धीकरण र संगठित अपराधसम्बन्धी अभियोग संशोधन गर्दै फिर्ता लिएको छ।
