मोरङ। कोशी प्रदेशका मुख्यमन्त्री हिक्मतकुमार कार्कीले प्रदेश आयोजना बैंकलाई समस्या नआउने गरी सञ्चालन गर्न निर्देशन दिनुभएको छ ।
कोशी प्रदेश योजना आयोगको आज यहाँ आयोजित बैठकमा आयोगको अध्यक्षसमेत रहनुभएका मुख्यमन्त्री कार्कीले आयोजना बैंकमा समावेश भएका योजनालाई छुट्याएर आगामी दिनमा यसलाई व्यवस्थित र चुस्त ढङ्गले सञ्चालन गर्न निर्देशन भयो ।
मुख्यमन्त्री कार्कीले कोशी प्रदेशका पहाडी तथा हिमाली क्षेत्रबाट भइरहेको बसाइसराइ रोक्न अध्ययन अनुसन्धान गर्न र योजनाअघि सार्नु जरुरी रहेको विचार राख्नुभयो ।
योजनाको प्राथमिकीकरण तथा सीमित स्रोतसाधनले पुग्ने गरी आयोजनाको छनोट गर्न र प्रदेशका गौरवका आयोजनाको अनुगमन र मूल्याङ्कन गर्न उहाँले आयोगलाई निर्देशन भयो ।
आयोजना बैंकमा ५० हजार ४०० योजना प्रविष्टि भएको आर्थिक मामिला तथा योजना मन्त्रालयका सचिव कोषहरि निरौलाले जानकारी दिनुभयो । कार्यविधिअनुसार प्रदेशले सञ्चालन गर्ने पूर्वाधारका आयोजना रु ५० लाखदेखि रु दुई करोडसम्मका छन् । आज बसेको बैठकले विभिन्न १२ निर्णय गरेको आयोगका उपाध्यक्ष तारानाथ निरौलाले जानकारी दिनुभयो ।
प्रदेश आयोजना बैंकलाई विषयगत र तहगत रुपमा एकीकृत गरी एकीकृत प्रणालीको विकास र व्यवस्थापन गर्ने, अन्तर प्रदेश योजना आयोग सम्मेलन गर्ने, प्रदेशका गौरव तथा रूपान्तरणकारी योजना तथा आयोजनाको प्रभावकारी अनुगमन र मूल्याङ्कन गर्ने निर्णय आजको बैठकले गरेको छ ।
कोशी प्रदेश तथ्याङ्क ऐन–२०८२ को नियमावलीको मस्यौदा तर्जुमा र एकीकृत तथ्याङ्क प्रणालीको विकास गरी प्रदेशमा तथ्याङ्कलाई व्यवस्थित गर्ने निर्णय गरिएको आयोगले जनाएको छ । स्थानीय रुपमा उत्पादन गरिने परम्परागत मदिराको ब्रान्डिङका लागि आवश्यक प्रविधि र कानुनी विषयमा थप अध्ययन गरी अघि बढ्ने तथा यसलाई अन्तिम टुङ्गोमा पु¥याउने निर्णय भएको छ ।रासस
