काठमाडौं । मुगुको छायाँनाथ रारा नगरपालिकामा अवस्थित राराताल प्राकृतिक सुन्दरताको अनुपम उपहार हो। रारा राष्ट्रिय निकुञ्जभित्र फैलिएको यो ताल नेपालकै सबैभन्दा ठूलो र गहिरो तालका रूपमा परिचित छ।
यो ताल समुद्र सतहदेखि २,९७२ मिटर उचाईमा छ । मुगुको गमगढीबाट परिश्चमतर्फ करिब ३ घण्टाको पैदल यात्रा गरेपछि राराताल पुगिन्छ । १० दशमलव ८ वर्ग किलोमिटर क्षेत्रफलमा फैलिएको रारा तालको अधिकतम लम्वाई ५ किलोमिटर र अधिकतम चौडाई ३।२ किलोमिटर छ । यो ताल १ सय ६७ मिटर गहिरो छ ।
प्रकृतिको उपहारको रूपमा श्रृजित राराताललाई रारा राष्ट्रिय निकुञ्जको मनोरम हरियाली यसमा पाइने कस्तुरी, रतुवा जस्ता जन्तुहरूका साथै नेपालको राष्ट्रिय चरा डाँफे र अन्य चरा चुरुङ्गीहरूले समेत थप शोभा पुर्याएका छन् ।
दिनभरीमा आफ्नो रुप फेरिरहने रारा ताल जेष्ठदेखि आश्विन महिनासम्म विभिन्न फुलहरूले सजिएर स्वर्गकी अप्सरा जस्तै देखिन्छ ।
चारैतिर हरियाली वनजंगल, नीलो आकाशको प्रतिविम्ब र शान्त वातावरणले राराताललाई स्वर्गझैँ बनाएको छ। बिहानको घामसँगै तालको पानीमा देखिने नीलो, हरियो र सुनौलो रङको मिश्रणले जो–कसैलाई मोहित बनाउँछ। हिउँदमा हिउँले ढाकिएका पहाडहरू र गर्मीयाममा फुल्ने रङ्गीचङ्गी फूलहरूले रारातालको सौन्दर्य झनै बढाइदिन्छ।
रारा राष्ट्रिय निकुञ्ज जैविक विविधताका लागि पनि विशेष महत्व राख्छ। यहाँ पाइने हिमाली वन्यजन्तु, चराचुरुङ्गी र दुर्लभ वनस्पतिले राराताल क्षेत्रलाई प्रकृति अध्ययन र अनुसन्धानका लागि उपयुक्त बनाएको छ। ताल वरिपरि पैदल यात्रा, डुंगा सयर र फोटो खिच्ने गतिविधिहरू पर्यटकका लागि मुख्य आकर्षण हुन्।
पछिल्ला वर्षहरूमा सडक र हवाई पहुँच सुधार हुँदै जाँदा राराताल आन्तरिक तथा बाह्य पर्यटकको रोजाइमा पर्न थालेको छ। स्थानीय संस्कृति, सरल जीवनशैली र पाहुनाप्रतिको आत्मीय व्यवहारले यहाँ आउने पर्यटकलाई छुट्टै अनुभूति दिन्छ।
प्रकृतिको काखमा शान्ति खोज्ने, भीडभाडबाट टाढा रहन चाहने र नेपालका हिमाली सौन्दर्यलाई नजिकबाट अनुभव गर्न चाहनेका लागि राराताल एक अद्वितीय गन्तव्य बनेको छ।
तस्बिर : विष्णु नेपाल / रासस
