काठमाडौं । चीनका राष्ट्रपति सी चिनफिङले प्रधानमन्त्री केपी शर्मा ओलीको स्वास्थ्य अवस्थाबारे चासो व्यक्त गरेका छन् । उनले शनिबार एक सन्देश पठाएर शीघ्र स्वास्थ्यलाभको कामना पनि गरेका छन् । प्रधानमन्त्री ओलीमा दोस्रो पटक मिर्गौला प्रत्यारोपण गरेको चौथो दिन राष्ट्रपति सीले एक सन्देश पठाएर हालै मिर्गौला प्रत्यारोपण गरेको जानकारी प्राप्त भएको उल्लेख गरेका छन् । चीन सरकार, त्यहाँका जनता र स्वयं आफ्नातर्फबाट प्रधानमन्त्रीको शीघ्र स्वास्थ्य लाभको कामना राष्ट्रपति सी ले सन्देशमार्फत गरेको प्रधानमन्त्रीका प्रेस सल्लाहाकार सूर्य थापाले जानकारी दिए ।
चिनियाँ कम्युनिस्ट पार्टीका महासचिवसमेत रहेका राष्ट्रपति सीले प्रधानमन्त्री ओलीसँग सहकार्य गर्दै दुई देशको सम्बन्ध र सहयोगलाई अगाडि बढाउन आफू प्रतिक्षारत रहेको पनि उल्लेख गरेका छन् । सन्देशमा दुई देश तथा चिनियाँ कम्युनिस्ट पार्टी र नेपाल कम्युनिस्ट पार्टी (नेकपा) बीचको सम्बन्धलाई थप विस्तार गर्दै त्यसलाई गतिशील बनाउन तथा दुई देशका जनताको हितका खातिर द्विपक्षीय सहयोगलाई अझ सुदृढ तुल्याउन प्रधानमन्त्री ओलीसँग काम गर्न प्रतीक्षारत रहेको उल्लेख गरेका छन् ।
यसैबीच, प्रधानमन्त्री ओलीको स्वास्थ्यमा सन्तोषजनक रूपमा सुधार भइरहेको त्रिवि शिक्षण अस्पतालले जनाएको छ । गत बुधबार मिर्गौला प्रत्यारोपण गराएका प्रधानमन्त्री ओलीले शनिबारबाट हिँड्डुल गर्न र सामान्य खाना ९दालभात० खान थालेको त्रिवि शिक्षण अस्पतालका कार्यकारी निर्देशक प्रा.डा. प्रेमकृष्ण खड्गाले जानकारी दिए । खड्गाकाअनुसार प्रधानमन्त्री ओलीलाई फिजियोथेरापी दिने कामलाई पनि निरन्तरता दिइएको छ ।
प्रधानमन्त्रीको स्वास्थ्यबारे गरिएका महत्वपूर्ण परीक्षणको रिपोर्ट सामान्य रहेको अस्पतालले जनाएको छ । प्रधानमन्त्रीलाई मिर्गौला दिने समीक्षा संग्रौलाको स्वास्थ्य अवस्था पनि सामान्य रहेको अस्पतालले जनाएको छ । उनले पनि सामान्य खाना खान र हिँड्डुल गर्न थालेको खड्गाले जानकारी दिए । दुवै जनालाई यो साता डिस्चार्ज गरिने अस्पताल स्रोतले जानकारी दिएको छ । सौर्य दैनिक
