काठमाडौँ । सरकारद्वारा फागुन २१ गतेका लागि प्रतिनिधिसभा निर्वाचनको मिति घोषणा भएसँगै नेपाली कांग्रेसभित्र संस्थापन पक्षका २५ केन्द्रीय सदस्यहरू सक्रिय बनेका छन्।
पार्टीको १५औँ महाधिवेशन प्रक्रिया तत्काल सुरु गर्नुपर्ने मागसहित उनीहरूले केन्द्रीय कार्यालय सानेपामा दर्ता गराएको ७ बुँदे ध्यानाकर्षणपत्रको समीक्षा गर्न ललितपुरमा बैठक बसेको छ।
ललितपुरको कुपण्डोलमा बसेको बैठकमा हालको राष्ट्रिय राजनीति, ७ बुँदे मागको प्रभाव तथा आगामी रणनीतिबारे छलफल भइरहेको एक केन्द्रीय सदस्यले जानकारी दिए।
उनका अनुसार भोलिका लागि बोलाइएको केन्द्रीय समितिको बैठकमा कसरी प्रस्तुत हुने भन्नेबारे पनि बैठकले तय गर्नेछ। “७ बुँदे मागमा हस्ताक्षर गरेका सबै जना हामी यहाँ सहभागी छौँ,” उनले बताए।
२५ केन्द्रीय सदस्यको मागमा पूर्वउपसभापति विजयकुमार गच्छदार र पूर्वमहामन्त्री डा. शशांक कोइरालाले पनि ऐक्यबद्धता जनाएका छन्।
सभापति शेरबहादुर देउवा समूहबाट विजयी केन्द्रीय सदस्यहरू—राजेन्द्रकुमार केसी, भरतकुमार शाह, अर्जुनप्रसाद जोशी, पुष्पा भुसाल, कर्णबहादुर बुढा, गणेश लामा, आङगेलु शेर्पा, डिला सङ्ग्रौला, उदयशम्शेर राणा, नानु बास्तोला, धना खतिवडा, अब्दुल रज्जाक, देवेन्द्रराज कँडेल, योगेन्द्र चौधरी, गोपाल दहित, बहादुर सिंह लामा, दिलमान पाख्रिन, अब्दुल सत्तार, मोहन आचार्य, अमृत अर्याल, जिपछिरिङ लामा, रामजनम चौधरी, चम्पादेवी खड्का, नारायणबहादुर कार्की र चीनकाजी श्रेष्ठ बैठकमा सहभागी छन्।
पार्टीभित्र आन्तरिक असन्तुष्टि बढ्दै गएको सन्दर्भमा संस्थापन पक्षीय सदस्यहरूको यस सक्रियताले कांग्रेसको आगामी निर्णय प्रक्रियामा महत्वपूर्ण प्रभाव पार्ने अनुमान गरिएको छ।
