काठमाडौँ। कृषि तथा पशुपन्छी विकासमन्त्री डा मदनप्रसाद परियारले जलवायु परिवर्तनसम्बन्धी संयुक्त राष्ट्रसङ्घीय संरचना महासन्धिका पक्ष राष्ट्रहरूको ३०औँ सम्मेलन (कोप–३०)मा नेपालको सहभागिता प्रभावकारी भइरहेको बताउनुभएको छ ।
ब्राजिलको बेलेममा जारी उक्त सम्मेलनमा नेपाली प्रतिनिधिमण्डलको नेतृत्व गर्दै सहभागी हुनुभएका उहाँले विभिन्न सत्रमा प्रभावकारी रूपमा नेपालको एजेण्डा प्रस्तुत गर्ने काम भइरहेको जानकारी दिनुभयो ।
ब्राजिलबाट वन तथा वातावरण मन्त्रालयले भर्चुअल रूपमा आयोजना गरेको पत्रकार सम्मेलन मन्त्री डा परियारले भन्नुभयो, “यस पटक नेपालको प्रतिनिधिमण्डल तुलनात्मक सानो छ, तर राष्ट्रका मुद्दा उजागर गर्ने सन्दर्भमा उपलब्धीमूलक भइरहेको हामीले अनुभूति गरेका छौँ ।”
उहाँले सम्मेलनअन्तर्गत आइतबार भएको मन्त्रीस्तरीय सत्रलाई सम्बोधन गर्दै विकसित राष्ट्रहरूले विगतमा गरेका जलवायु वित्तसम्बन्धी प्रतिबद्धता पूरा गर्नुपर्ने बताउनुभएको जानकारी दिनुभयो । साथै उहाँले १.५ डिग्री सेल्सियसको लक्ष्य साकार राख्नका लागि उदाउँदो अर्थतन्त्रसहित सबै पक्षहरूले रचनात्मक रूपमा संलग्न हुनुपर्नेमा आफूले जोड दिएको उल्लेख गर्नुभयो ।
मन्त्री डा परियारले गत जेठमा काठमाडौँमा सम्पन्न सगरमाथा संवादको सन्दर्भ स्मरण गराउँदै युएनएफसिसिसी प्रक्रियामा हिमालसम्बन्धी एजेन्डालाई तुरुन्तै समावेश गराउनुपर्नेमा नेपाल प्रयासरत रहेको अवगत गराउनुभयो । सम्मेलन यही नोभेम्बर १० तारिखमा सुरु भएर २१ तरिखसम्म चल्नेछ ।
“सम्मेलनकै दौरान विभिन्न महत्त्वपूर्ण साइडलाइन भेटवार्ता पनि भएका छन्”, उहाँले भन्नुभयो, “हानिनोक्सानी कोषका कार्यकारी निर्देशक इब्राहिम चेइख डियोङसँग भएको भेट उपलब्धीमूलक भएको महसुस गरेको छु । उक्त भेटमा कोषबाट सञ्चालित हुने परियोजना नेपालमा प्राथमिकताका साथ लागु गर्नका लागि सकारात्मक छलफल भएको छ ।”
जलवायु परिवर्तनका असरबाट प्रभावित नेपालजस्ता मुलुकका लागि जलवायु वित्तमा वृद्धि, सहज पहुँच, प्रक्रिया सरलिकरण र प्रविधि हस्तान्तरणजस्ता विषयमा पनि नेपालले जोड दिएको उहाँको भनाइ छ ।
यसैगरी वन मन्त्रालयको जलवायु परिवर्तन व्यवस्थापन महाशाखाका प्रमुख एवं सहसचिव डा महेश्वर ढकालले सम्मेलनमा नेपालका तर्फबाट भइरहेका प्रयास र सहभागिता बारेमा जानकारी गराउनुभएको थियो ।
उहाँले सगरमाथा संवादका निष्कर्षका साथ युएनएफसिसिसी प्रक्रियामा हिमालसम्बन्धी एजेन्डालाई स्थापित गर्न आफूहरू लागिरहेको जानकारी गराउनुभयो । सम्मेलनमा नेपाल जलवायुजन्य हानिनोक्सानी, अनुकूलन, न्यूनीकरण, कार्बन वित्त र पेरिस सम्झौताको धारा ६, जलवायु वित्त, जलवायुका विषयमा पारदर्शिता ढाँचा, क्षमता अभिवृद्धि र प्रविधि हस्तान्तरण तथा जलवायु न्यायलगायतका विषयमा आधारित रहेर प्रस्तुत भइरहेको उहाँले बताउनुभयो ।
मन्त्री डा परियार यही नोभेम्बर १५ तारिखमा बेलेम पुग्नुभएको थियो । ब्राजिलस्थित नेपालका राजदूत निर्मलराज काफ्लेसहित कोप–३० मा सहभागी नेपाली सरकारी उच्च अधिकारीहरूले उहाँलाई स्वागत गर्नुभएको थियो । उहाँ नोभेम्बर १९ तारिखमा स्वदेश फर्कनुहुने कार्यक्रम रहेको छ ।
