काठमाडौँ। कानुन, न्याय तथा संसदीय मामिलामन्त्री अनिलकुमार सिन्हाले निर्वाचनको मुख्य पक्ष राजनीतिक दलहरु भएकाले चुनावको वातावरण बनाउन उनीहरुको उत्तिकै भूमिका रहने बताउनुभएको छ ।
नेपाल कानुन समाजद्वारा यहाँ आज आयोजित ‘आगामी प्रतिनिधिसभाको निर्वाचनः चुनौती र अवसर’ विषयक अन्तक्र्रियामा मन्त्री सिन्हाले सरकार, राजनीतिक दल तथा अन्य सरोकारवाला पक्षबीचको घनिभूत छलफल र बहसले चुनावी वातावरण बनाउने धारणा व्यक्त गर्नुभयो ।
मन्त्री सिन्हाले भन्नुभयो, “जसका लागि चुनाव आवश्यक छ, उनीहरुले पनि वातावरण बनाउन भूमिका खेल्नुपर्छ, निर्वाचन गराउने सन्दर्भमा सबैले राम्रो नियत राखौँ, निकास दिऔँ ।”
सरकारले आगामी निर्वाचनलाई केन्द्रित गरी राजनीतिक दल र नेताहरुसँग निरन्तर संवाद गरिरहेको उल्लेख गर्दै उहाँले राज्य सञ्चालनको अनुभवका कारण कतिपय सन्दर्भमा केही कमीकमजोरी भए पनि वर्तमान सङ्कटबाट मुलुकलाई निकास दिलाउन प्रयासरत रहेको स्पष्ट पार्नुभयो ।
मन्त्री सिन्हाले विदेशमा रहेका नेपाली नागरिकलाई मताधिकार दिलाउने सम्बन्धी प्रक्रिया र तयारीको अवस्था शून्य रहेको त्यसको सम्भावना पहिचान गर्ने कार्यलाई सरकारले प्राथमिकतामा राखेको बताउनुभयो ।
उहाँले भन्नुभयो, “युवापुस्ताले अवसरको खोजी गरिरहेको छ, उनीहरुको भावनालाई सम्बोधन गर्न सरकार क्रियाशील छ, सङ्कटको निकास दिन जिम्मेवारीका काम भइरहेको छ, यसमा शङ्का गर्नुपर्दैन ।” रासस
