काठमाडौँ ।अन्तरिम सरकारका कानून, न्याय तथा संसदीय मामिलामन्त्री अनिलकुमार सिन्हाले वर्तमान सरकारले राजनीतिक दलहरुलाई कहिल्यै पनि अवमूल्यन नगरेको बताउनुभएको छ ।
प्रधानमन्त्री सुशीला कार्कीले राजनीतिक दलहरुलाई अवमूल्यन गरेको विश्लेषण भइरहेका बेला उहाँले यस्तो दाबी गर्नुभएको हो ।
शुक्रवार सिंहदरवारमा बसेको राष्ट्रिय सभा कार्य व्यवस्था परामर्श समितिको बैठकमा बोल्दै मन्त्री सिन्हाले असन्तुष्ट पक्षहरुसँगको पटक पटक छलफल गर्नुपर्ने बाध्यताले राजनीतिक दलहरुसँगको सम्पर्क केही ढिला हुन गएको पनि स्पष्ट पार्नुभयो । सरकारले राजनीतिक दलहरुलाई अवमूल्यन गरेर अघि बढ्दा असहज परिस्थिति आउँछ भनेर अनुभुति गरिरहेको उहाँको भनाई थियो । मन्त्री सिन्हाले वर्तमान सरकारले प्रतिनिधि सभाको निर्वाचन गराएर जनप्रतिनिधिहरुलाई सत्ता हस्तान्तरण गर्ने एक मात्रै लक्ष्य लिएपनि असन्तुष्ट पक्षको सुनुवाई गर्नुपर्ने, सरकारको दैनिक काम पनि गर्नुपर्ने भएकाले निर्वाचनको तयारीको कामले तीव्रता नपाएजस्तो देखिएको पनि तर्क गर्नुभयो । उहाँले शुरुका दिनमा सरकारले जेन–जी समूहहरुसँगको छलफलमा धेरै समय बिताउनुपरेको पनि उल्लेख गर्नुभयो ।
मन्त्री सिन्हाले भन्नुभयो,‘हामी संसदीय अभ्यास अलिकति बे्रक भएको बेलामा यसको एउटा पुल निर्माण गरेर पुन जनप्रतिनिधिहरुलाई हस्तान्तरण गर्नको निमित्त एक मात्र लक्ष्य लिएर हिँडेका छौँ । तर चुनाव मात्रै लक्ष्य रहँदैन रहेछ । चुनावको तयारीको क्रममा गर्नुपर्ने विभिन्न कामको साथसाथै असन्तुष्ट कतिपय पक्षको कुरा सुन्नुपर्ने कारणले गर्दा र सरकारको दैनिकी समेत सञ्चालन गर्नुपर्ने कारणले गर्दा हामीहरु अलिकति ढिलो भएको हो । हामीहरुले दलहरुसँग सम्पर्क गर्न केही ढिला भएकै थियो । जेन–जीका जुन समूहहरु हुनुहुन्छ ।’
‘हाँहरुसँगको पटक पटकको छलफलमा धेरै समय गएको पनि थियो । र, यो सरकारले कहिल्यै पनि दलहरुलाई अवमूल्यन गरेको छैन भन्ने कुरा यहाँहरुलाई अनुरोध गर्न चाहन्छु । दललाई अवमूल्यन गर्दाखेरी कस्तो असहज अवस्था सृजना भएको थियो भनेर हामीले अनुमूति गरिसकेका छौ । हामीले शुरुशुरुमा सुरक्षाको प्रत्याभूति दिनुपर्ने अवस्था थियो । अल्पकालिन सुरक्षाको प्रत्याभूतिको अवस्था थियो । मध्यकालीन र दिर्घकालीन ३ वटै सोच बनाउनुपर्ने कारणले गर्दा सुरुको स्थिति सम्हाल्नको निमित्त हामीहरुलाई गाह्रो परेकै हो । हामी नेपाली नागरिकहरु कति सुर छौँ भन्नेकुरा कहाँबाट देखियो भने त्यत्रो घटना भएको तेस्रो दिनदेखि बाटोमा निस्केर सौहार्दपूर्ण वातावरण निर्माण गर्न जनतानै लागि रहनुभएको थियो । जुत्ता, चप्पल, लुगा केही नभएका, पकाउन भाँडा नभएका, पकाउने सामान नभएका हाम्रा सुरक्षाकर्मीहरुलाई जनताले नै यति सहयोग गर्नु भयो कि त्यसका निम्ति आभार व्यक्त गर्ने मसँग शब्द नै छैन ।’
मन्त्री सिन्हाले मुलुकको सुरक्षा अवस्थालाई सहज बनाउन सर्वसाधारण जनताले प्रहरीलाई गरेको सहयोगको समेत खुलेर प्रशंशा गर्नुभयो । उहाँले सुरक्षा व्यवस्थालाई सहज बनाउने कठिन कार्यमा सरकारलाई सर्वसाधारण जनताले ठूलो साथ दिएको समेत बताउनु भयो । –
