एजेन्सी । संयुक्त राज्य अमेरिका टिकटकसम्बन्धी विवाद सुल्झाउन चीनसँगको सम्झौताको ‘धेरै नजिक’ पुगेको अमेरिकी अर्थमन्त्री स्कट बेसेन्टले सोमबार मेड्रिडमा जारी व्यापार वार्ताका क्रममा बताउनुभएको छ ।
बेसेन्ट र चिनियाँ उपप्रधानमन्त्री हे लिफेङले आइतबार मेड्रिडमा पछिल्लो चरणको वार्ता सुरु गर्नुभएको थियो । यस वार्ताले व्यापार र प्रविधिमा रहेका मतभेदलाई कम गर्दै दुई ठूला अर्थतन्त्रबीचको सम्बन्धलाई सहज बनाउन खोजेको हो । बैठकहरू बुधबारसम्म चल्ने अपेक्षा गरिएको छ । बुधबार टिकटकका लागि खरिदकर्ता फेला पार्ने वा प्रतिबन्धको सामना गर्ने समयसीमा पनि हो ।
“टिकटक सम्झौतामा हामी मुद्दा समाधान गर्न निकै नजिक छौँ”, बेसेन्टले दोस्रो दिनको वार्ताका लागि स्पेनको विदेश मन्त्रालय आइपुगेपछि पत्रकारहरूसँग भन्नुभयो, “यदि हामी सहमतिमा पुग्न सकेनौँ भने पनि यसले दुई देशबीचको समग्र सम्बन्धलाई असर गर्दैन । सम्बन्ध अझै पनि उच्च स्तरमा राम्रो छ ।”
टिकटक चीनमा आधारित इन्टरनेट कम्पनी बाइटडान्सको स्वामित्वमा छ । राष्ट्रिय सुरक्षाको आधारमा टिकटकको बिक्री वा प्रतिबन्ध आवश्यक पर्ने सङ्घीय कानून राष्ट्रपति डोनाल्ड ट्रम्पको दोस्रो कार्यकाल सुरु हुनुभन्दा एक दिनअघि जनवरी २० देखि लागू हुने थियो ।
आफ्नो सन् २०२४ को चुनाव अभियानमा सामाजिक सञ्जाल महत्त्वपूर्ण थियो र आफूले टिकटकलाई मन पराउने बताउनुहुने ट्रम्पले प्रतिबन्धमा रोक लगाउनुभएको थियो । जुनको मध्यतिर उहाँले एपका लागि गैर–चिनियाँ खरिदकर्ता खोज्न वा अमेरिकामा प्रतिबन्ध लाग्ने विकल्पसहित ९० दिनको समयसीमा थप्नुभएको थियो । त्यो म्याद यही बुधबार समाप्त हुँदैछ ।
लामो समयदेखि विभाजन वा प्रतिबन्धलाई समर्थन गर्दै आउनुभएका ट्रम्पले पछि आफ्नो अडान बदल्दै प्लेटफर्मको रक्षा गर्ने वाचा गर्नुभयो । करिब दुई अर्ब प्रयोगकर्ता भएको यो एपले नोभेम्बरको चुनावमा युवा मतदाताको समर्थन बढाएको विश्वास गरिएको छ ।
मेड्रिडमा भएको वार्ताले चिनियाँ आयातमा कडा भन्सार शुल्क लगाउने ट्रम्पको धम्कीलाई पनि समेटेको छ । यस वर्षको सुरुमा व्यापार तनाव तीव्र बनेको थियो, जसमा प्रतिशोधात्मक करहरू तीन अङ्कसम्म पुगे र आपूर्ति शृङ्खलामा असर पारे ।
पछि दुवै सरकार अमेरिकी सामानमा ३० प्रतिशत र चिनियाँ निर्यातमा १० प्रतिशत भन्सार शुल्क फिर्ता लिन सहमत भए, तर अस्थायी युद्धविराम नोभेम्बरमा समाप्त हुने तय छ ।
