काठमाडौं । महानगरीय प्रहरी प्रभाग कोटेश्वरको इन्चार्जबाट अन्यत्र सरुवा भई जान लागेकी प्रहरी निरीक्षक शुभद्रा वाइवालाई विहीबार सरस्वती क्लव कोटेश्वरले सम्मानसहित विदाई गरेको छ ।
क्लवका अध्यक्ष एवम् अखिल नेपाल फूटवल संघ (एन्फा)का वरिष्ठ उपाध्यक्ष शिक्षित पराजुली तथा क्लवका उपाध्यक्ष एवम् एन्फाको सामाजिक उत्तरदायित्व समितिका अध्यक्ष उत्तम भण्डारीले प्रहरी निरीक्षक वाइवालाई क्लवको तर्फबाट संयुक्तरुपमा दोसल्ला ओढाएर सम्मान गरे ।
सोही अवसरमा सेतीओपी युवा क्लवका अध्यक्ष रवि रिमाल, स्थानीय वरिष्ठ पत्रकार बलराम प्यासी, कोटेश्वर महादेवस्थान व्यवस्थापन समितिका अध्यक्ष वैजुहरि भट्टराई, कोटेश्वर समाज सुधार क्लवका अध्यक्ष सुवाश रिमाल, लायन्स क्लव इन्टरनेशनल डिस्ट्रिक्ट ३२५ए२ का जोन चेयरसपर्सन इन्द्र बहादुर कार्की, स्थानीय युवा समाजसेवी मधुकर केसी र सुनिल केसी एव एवंम सहयोगी नगर युवा क्लवका अध्यक्ष गोपाल तण्डुकार लगायतले निरीक्षक वाइवालाई खादा ओढाएर सम्मान गरे ।
सम्मान तथा विदाई कार्यक्रममा एन्फाका वरिष्ठ उपाध्यक्ष पराजुली, एन्फाका सामाजिक उत्तरदायित्व समितिका अध्यक्ष भण्डारी, लायन्स क्लवका कार्की, सेतीओपी युवा क्लवका अध्यक्ष रिमाल तथा कोटेश्वर महादेवस्थान व्यवस्थापन समितिका अध्यक्ष भट्टराईले प्रहरी निरीक्षक वाइवाले आफ्नो कार्यकालमा कोटेश्वर क्षेत्रका स्थानीय क्लव तथा सामाजिक संघ संस्थासंग मिलेर गरेको कार्य प्रशंसनिय भएको चर्चा गरे भने विदाई हुन लागेकी प्रहरी निरीक्षक वाइवाले छोटो समय कोटेश्वर प्रभागको इन्चार्जको रुपमा काम गर्न पाएतापनि आफ्नो कार्यकाल सन्तोषजनक भएको भन्दै सहयोगीहरु सबैप्रति धन्यवाद व्यक्त गरीन् ।
गत भदौ ३० गतेदेखि महानगरीय प्रहरी प्रभाग कोटेश्वरको इन्चार्ज भएर आएकी प्रहरी निरीक्षक वाइवाको यही बैशाख ९ गते सरुवा भएको थियो ।
