काठमाडौँ । प्रतिनिधि सभाको कृषि, सहकारी तथा प्राकृतिक स्रोत समितिको आयोजनामा नेपालमा पहिलो पटक भएको हिन्दुकुश हिमालय क्षेत्रका मुलुकका सांसदको दुई दिने सम्मेलन पाँच बुँदे आह्वान जारी गर्दै सम्पन्न भएको छ ।
सोमवार र मंगलवार काठमाडौंमा भएको उक्त सम्मेलनको मुख्य विषय ‘प्रकृतिको संरक्षण, जनताको सशक्तीकरण’ रहेको थियो । हिन्दुकुश हिमालय क्षेत्रका मुलुकका सांसदहरुले जलवायु परिवर्तन तथा जैविक विधिधताको संरक्षणका लागि तत्काल कार्य शुरु गर्न आह्वान गरेको परराष्ट्र मन्त्रालयका सहसचिव लोकबहादुर क्षेत्रीले बताउनु भयो ।
सम्मेलनपश्चात आयोजित पत्रकार सम्मेलनमा बोल्दै क्षेत्रीले साझा पारिस्थितिक, सामाजिक तथा आर्थिक महत्व बोकेको हिन्दुकुश हिमालय क्षेत्रमा बढ्दो जलवायु सङ्कट, प्रदूषण र जैविक विविधताको क्षति समुदाय र पारिस्थितिकी प्रणालीका लागि गम्भीर चुनौती भएको निष्कर्ष निकालेको पनि बताउनु भयो । उहाँकाअनुसार भावी पुस्ताको सुरक्षित भविष्यका लागि जलवायु सहनशीलता, स्वच्छ वायु र जैविक विविधता संरक्षणलाई प्राथमिकतामा राख्नुपर्नेमा पनि सम्मेलनले जोड दिएको छ ।
पूर्वमा म्यानमारदेखि पश्चिमको अफगानिस्तानसम्म फैलिएको तीन हजार ५०० किलोमिटर हिन्दकुश हिमालय क्षेत्रबाट पग्लने हिउँ यो क्षेत्रका १०० प्रमुख नदीको पानीको स्रोत मानिन्छ । यी प्राकृतिक स्रोत र जैविक विविधताको संरक्षणमा सम्मेलनले जोड लिएको छ ।
