काठमाडाैंः नेपाली सेनाकाे समरी जनरल सैनिक अदालतबाट सैनिक आवासिय महाविद्यालय, भक्तपुरमा कार्यरत रहंदा सम्पत्ति र अनुशासन तथा आचरण सम्बन्धी कसूर गरेको अभियोगमा दोषी ठहरिएका तीन जना सैनिक अधिकृत तथा दुई जना अन्य दर्जालाई सैनिक ऐन २०६३ बमोजिम कारवाही गरिएको नेपाली सेनाले जनाएकाे छ ।
सैनिक कल्याणकारी कोषको लगानीमा सन्चालित सैनिक आवासिय महविद्यालय, भक्तपुरमा आर्थिक अनियमितता भएको भन्ने सम्बन्धमा सत्यतथ्य छानबिन गर्न सहायक रथीको अध्यक्षतामा गठित कोर्ट अफ इन्क्वायरी बोर्डको मिति २०७६ फागुन २३ गतेको राय सहितको प्रतिबेदनको आधारमा तत्कालिन सम्पर्क अधिकृत महासेनानी भुपालमान अधिकारी सहित १८ जनाको मुद्दा पुर्पक्ष गर्न उपरथीको अध्यक्षतामा मिति २०७६ चैत ६ गते गठित समरी जनरल सैनिक अदालतले फैसला सुनाएको हाे ।
फैसलामा महा सेनानी भुपालमान अधिकारीले महाविद्यालयकाे सम्पर्क अधिकृत रहेको अवधिमा आर्थिक अनियमितता गरी गराई सैनिक ऐन विपरीतकाे कसूर गरेकाे भन्दै दुई महिना कैद गर्ने, भविष्यमा सरकारी सेवाको निमित्त अयोग्य नठहरीने गरी सेवाबाट हटाउने तथा निजले गैरकानूनी रुपमा आर्थिक उपार्जन गरी लिए, खाएको ठहरिन आएको विगो रकम रु एक करोड ८५ लाख ४० हजार असुल उपर गर्ने भनिएकाे छ ।
त्यस्तै प्रमुख सेनानी देव बहादुर क्षेत्रीले आर्थिक अनियमितता गरेकाे ठहर गर्दै दुई बर्ष बढुवा रोक्का गर्ने र निजबाट रकम रु चार लाख ४० हजार असुल उपर गर्ने, हुद्धा यज्ञराज पोखरेललाइ भविष्यमा सरकारी सेवाको लागि अयोग्य नठहरीने गरी सेवाबाट हटाउने तथा निजबाट रकम तीन लाख ६० हजार असुल उपर गर्ने, अर्का हुद्धा गणेश बहादुर अधिकारीलाइ दुई बर्ष तलव वृद्धि रोक्का गर्ने तथा निजले हिनामिना गरेको दश हजार असुल उपर गर्ने फैसला भएकाे छ ।
लेखा आ सहसेनानी सुरेन्द्र विक्रम भण्डारीले आर्थिक कार्यहरु गर्दा कानूनी प्रकृया अवलम्वन नगरी नगराई सैनिक ऐन विपरीत कार्य गरेकाे भन्दै निजलाइ नसिहत दिने तथा सोही मुद्धामा अन्य १३ जनाले अभियोग मागदावीबाट सफाई पाउने गरी ठहर फैसला भएको नेपाली सेनाले जनाएकाे छ ।
सैनिक अनुशासन र आचरण बिरुद्धको क्रियाकलापमा शून्य सहनशिलताको नीति लिएको नेपाली सेनाले स्पष्ट गरेकाे छ ।