काठमाडौ। नेकपा माओवादी केन्द्रका अध्यक्ष पुष्पकमल दहालले भौतिक रूपमा भेटेरै भैरहेको बधाई एवं शुभकामनालाई रोक्नु भएको छ । दाहालको सचिवालय आज एक सूचना जारी गर्दे राजनीतिक कामको व्यस्तता, भीडभाड र स्वास्थ्य सतर्कताको कमिका कारण काठमाडौं लगायतका विभिन्न स्थानमा बढेको कोभिड संक्रमण तथा स्वास्थ्यकर्मीहरुको समेत सुझावलाई मध्यनजर गर्दै विगत तीन दिन यतादेखि भौतिक रूपमा भेटेरै भैरहेको बधाई एवं शुभकामना आदानप्रदानलाई आजैका दिनदेखि रोकेको कुरा जानकारी गराएको छ ।
अध्यक्ष दाहालको सचिवालयले पार्टीको नियमित प्रक्रियामार्फत हुने संस्थागत भेटघाटलाई पार्टी केन्द्रीय कार्यालय पेरिसडाँडामार्फत व्यवस्थित गर्न कोसिस गर्ने जनाएको छ । यसै गरी कतिपय सम्वाद, भेटघाट, बैठक र छलफललाई प्रविधिको प्रयोगमार्फत सहजिकरण गर्ने जानकारी गराएको छ । सूचनामा केन्द्रीय कार्यालयका कतिपय जिम्मेवारनेताहरु लाई समेत कोभिड संक्रमण पुष्टि भएकोले कार्यालयमा हुने भीडभाडमा पनि उच्च स्वास्थ्य सतर्कता अपनाउन सबैमा अनुरोध गरिएको छ ।
