काठमाडौं । पूर्वराजा ज्ञानेन्द्र शाहलाई ७९ औं जन्मोत्सवका अवसरमा राप्रपा नेपालका अध्यक्ष कमल थापाले शीघ्र गद्धी आरोहणको शुभकामना दिएका छन् ।
राप्रपा नेपालका अध्यक्ष थापाले सामाजिक सञ्जालमार्फत् जनताको चाहनाअनुसार पूर्वराजा ज्ञानेन्द्रले शीघ्र गद्धीआरोहणको शुभकामना दिएका हुन् । उनले ७९ औं जन्मोत्सवको अवसरमा पूर्व राजाको सुख, शान्ति, सुस्वास्थ्यको कामनासमेत गरेका छन् ।
थापाले लेखेका छन् –
७९ औं शुभजन्मोत्सवको पावन अवसरमा पुर्व श्री ५ महाराजाधिराज ज्ञानेन्द्र बिर बिक्रम शाहदेवमा सुख,शान्ति, सुस्वास्थ्य र जनताको चाहना अनुरूप शिघ्र गद्दि आरोहणको मंगलमय शुभ(कामना ।
राजावादीहरुले पूर्वराजा ज्ञानेन्द्र शाहको ७९ औं जन्मोत्सव आज विभिन्न कार्यक्रम गरी मनाउँदै छन् । राजावादीहरुले देशभर दीप प्रज्वलन गरेर पूर्वराजा ज्ञानेन्द्रको जन्मोत्सव मनाउने भएका हुन् ।
संयुक्त जनआन्दोलन समितिका संयोजक नवराज सुवेदीले यसअघि नै शुभेच्छुक जनसमुदाय र विभिन्न संघ–संस्थाहरूलाई पूर्वराजाको जन्मोत्सवको देशभर दिन दीप प्रज्ज्वलनलगायत कार्यक्रमहरू आयोजना गर्न समर्थकलाई आग्रह गरिसकेका छन् ।
जन्मोत्सवका अवसरमा आज बिहान ११ बजेदेखि दिउँसो २ बजेसम्म निर्मल निवासमा पूर्वराजासमक्ष शुभकामना तथा अभिवादन चढाउन सकिने कार्यक्रम रहेको छ ।
संयुक्त जनआन्दोलन समितिले राजा र जनता मिलेर राष्ट्र जोगाएको इतिहासलाई स्मरण गर्दै जन्मोत्सव मनाउन लागिएको बताइएको छ ।
