काठमाडौं । हिमालय एअरलाइन्स्ले ल्हासा–पोखरा–ल्हासा सेड्युल उडान सेवा सुरु गरेको छ । ‘रुफ अफ द वल्र्ड’ भनेर चिनिने विश्व प्रसिद्ध सहर ल्हासाबाट नेपालको पर्यटकीय राजधानी पोखरासम्म हिजोदेखि सेड्यसल उडान सुरु गरिएको हो । यो ऐतिहासिक सेड्युल उडान सेवामार्फत् हिमालय एअरलाइन्स्ले नेपाल र चीनबीचको हवाई सम्पर्कलाई सुदृढ गर्ने विश्वास एअरलाइन्सले लिएको छ ।
हिमालय एअरलाइन्स्ले काठमाडौँ–ल्हासा–पोखरा–ल्हासा–काठमाडौँ सेक्टर जोड्न तथा मागको आधारमा आगामी दिनमा उडानहरू पनि थप्ने योजनासहित हाल हप्तामा एउटा उडान सञ्चालन गर्दै छ । ल्हासा–पोखरा उडानले ल्हासा गोङ्गर विमानस्थलबाट हिजो चीनको स्थानीय समयअनुसार दिउँसो १४ बजेर ३९ मिनेटमा उडान भर्यो । एक घण्टा चौतीस मिनेटको उडान समयपछि कुल १०७ यात्रुहरूसहित नेपाली स्थानीय समयअनुसार १३ बजेर ५६ मा पोखरा अवतरण गरेको एअरलाइन्सले जनाएको छ । पोखरा–ल्हासा उडान पोखरा अन्तर्राष्ट्रिय विमानस्थलबाट अप्रिल ०१, २०२५ मा स्थानीय समयअनुसार बिहान ८ बजेर २० मा प्रस्थान गरी चीनको स्थानीय समयअनुसार १२ बजेर ५ मिनेटमा ल्हासा गोङ्गर विमानस्थलमा अवतरण गर्ने छ ।
नयाँ ल्हासा–पोखरा–ल्हासा उडानले यात्रुहरूलाई नेपालको पर्यटन राजधानी पोखरा र चीनको ऐतिहासिक तथा मनोरम सहर ल्हासाबीच सिधा र सहज हवाई सेवाको विकल्प प्रदान गर्दैछ ।
ल्हासा–पोखरा–ल्हासा उडान सेवाको उद्घाटन कार्यक्रममा गण्डकी प्रदेशका मुख्यमन्त्री सुरेन्द्रराज पाण्डे प्रमुख अतिथिका रूपमा उपस्थित हुनु भएको थियो । यसका साथै, संस्कृति, पर्यटन तथा नागरिक उड्डयन राज्यमन्त्री अरुणकुमार चौधरी, गण्डकी प्रदेशका उद्योग र पर्यटन मन्त्री मित्रलाल बस्याल, नेपालका लागि जनवादी गणतन्त्र चीनका राजदूत चेन सोङ, पोखरा महानगरपालिकाका मेयर धनराज आचार्य, नेपाल नागरिक उड्डयन प्राधिकरणका उपमहानिर्देशक देवचन्द्र लाल कर्णलगायत अन्य विशिष्ट व्यक्ति सहभगाी थिए ।
कार्यक्रममा गण्डकी प्रदेशका मुख्यमन्त्रीसुरेन्द्रराज पाण्डेले गण्डकी प्रदेशको पर्यटन प्रवद्र्धनमा कनेक्टीभिटीको भूमिकामा जोड दिनुभयो । उहाँले पोखरालाई गन्तव्यको रूपमा रोजेकोमा हिमालय एअरलाइन्स्को प्रशंसा गर्दै नियमित उडानहरू कायम राख्ने चुनौतीहरूलाई स्वीकार गर्नुभयो ।
त्यस्तै संस्कृति, पर्यटन र नागरिक उड्डयन राज्यमन्त्री अरुणकुमार चौधरीले नेपालका सबै सरोकारवालाहरूलाई हिमालय एअरलाइन्स्लाई सहयोग गर्न आग्रह गर्नुभयो ।
नेपालका लागि जनवादी गणतन्त्र चीनका राजदूत चेन सोङले पोखरेली जनतालाई पहिलो निर्धारित व्यावसायिक उडानका लागि बधाई दिनुभयो । अन्तर्राष्ट्रिय उडानको सपना हिमालयले वास्तविक बनाएको भन्दै उहाँले थप अन्तर्राष्ट्रिय उडानहरू र थप अन्तर्राष्ट्रिय गन्तव्यहरू प्राप्त गर्ने विश्वास व्यक्त गर्नुभयो ।
