झापा। लोपोन्मुख किसान, मुण्डालगायतका २३ बढी जातजाति रहेको मेचीनगर नगरपालिकामा नेपाल आदिवासी जनजाति महासङ्घले बृहत् सांस्कृतिक महोत्सव गर्ने भएको छ ।
आदिवासी जनजातिको लोप हुन लागेको जातीय पहिचान, संस्कृतिको उत्थान र संरक्षण गर्ने उद्देश्यले यही चैत २७ गतदेखि वैशाख २ गतेसम्म महोत्सव आयोजना गर्न लागेको नेपाल आदिवासी जनजाति महासङ्घ समन्वय परिषद्ले जनाएको हो ।
काँकडभिट्टा खेल मैदान परिसरमा आयोजना गरिने महोत्सवमा तामाङ, मेचे, सुनुवार, गुरुङ, राई, थामी, राजवंशी, लिम्बू, नेवार, धिमाल, माझी, शेर्पा, मगर, भुजेल, थारु, बिर्जा, किसान र मुण्डा जातिको परम्परागत घर तथा संस्कृति पर्यावरण झल्किने स्टल रहने नेपाल आदिवासी जनजाति महासङ्घ समन्वय परिषद् मेचीनगरका निवर्तमान अध्यक्ष ओमप्रकाश खापुङले जानकारी दिनुभयो ।
महोत्सव निर्देशक समिति संयोजक केवलराम राईले आदिवासी जनजातिको संस्कृति र पहिचानसँग जोडिएको महोत्सव विसं २०७० देखि सुरु गरिएको बताउनुभयो । उहाँले महोत्सव विसं २०७२ मा दोस्रो र लामो समयपछि यसपटक १८ वटा जातिको सहकार्यमा तेस्रो सांस्कृतिक महोत्सव गर्न लागिएको जानकारी दिनुभयो ।
उहाँका अनुसार आदिवासीको मौलिक खानपान, सांस्कृतिक भेषभूषा र प्रत्येक दिन तीन वटा जातीय समुदायले विशेष सांस्कृतिक कार्यक्रम गर्नेछन् । रासस
