काठमाडौं। नेपाल सुपर लिग (एनएसएल) को तेस्रो संस्करणको पहिलो खेलमा काठमाडौं रेजर्स एफसी र ललितपुर सिटी एफसीले बराबरी खेलेका छन् ।
त्रिपुरेश्वरस्थित दशरथ रंगशालामा सम्पन्न खेलमा साविक विजेता ललितपुर र पहिलो संस्करणको विजेता काठमाडौंले २-२ गोलको बराबरी खेल्दै अङ्क बाँडेका हुन् ।
काठमाडौं रेजर्सले दुई गोलले पछि परेको अवस्थामा सानदार पुनरागमन गर्दै बराबरी गर्यो । भ्याली डर्बी खेलमा ललितपुरले सुरुवाती १५ मिनेटमै दुई गोल गरेको थियो । खेलको पाँचौ मिनेटमै जोनाथान कान्टिलानाले कर्नर साइडबाट क्रस गरेको बल काठमाडौंका डिफेण्डर कमल श्रेष्ठलाई लाग्दै गोल भएको थियो ।
यस्तै, ललितपुरले १५औं मिनेटमा आदित्य शाक्यको गोलबाट अग्रता दोब्बर पार्यो । पहिलो हाफमा दुई गोलले पछि परेको काठमाडौंले दोस्रो हाफमा पुनरागमन गर्यो । काठमाडौंका लागि विदेशी खेलाडी अमादोउ डिओपले ७६औं मिनेटमा गोल फर्काउँदै अग्रता छोट्याए । काठमाडौले इन्जुरी समयमा पेनाल्टीमा गोल गर्दै खेल बराबरी गर्यो ।
ललितपुरका डिफेन्डरले भिनसेन्ट कोजिएलोलाई पेनाल्टी बक्समा लडाएपछि काठमाडौंले पेनाल्टी पाएको थियो । उनै कोजिएलोले पेनाल्टीमा गोल गर्दै काठमाडौंको हार टारे ।
