काठमाडौँ । नेकपा (माओवादी केन्द्र)का अध्यक्ष पुष्पकमल दाहालले राजावादीहरुको षड्यन्त्र समाजवादी मोर्चाले असफल पारेको दाबी गर्नुभएको छ ।
शनिवार काठमाडौंमा आयोजित एक कार्यक्रमलाई सम्बोधन गर्दै उहाँले यस्तो बताउनुभएको हो । समाजवादी मोर्चाले ठूलो जनसमुदायबीच विरोध सभा नगरेको भए राजावादीहरुले ठूला आपराधिक घटना गराउने दाबी गर्नुभयो ।
उहाँले आफूले राजावादीहरुले ठूला घटना गराउने योजना बनाएको सूचना पाएको दाबी गर्नुभयो । उहाँले राजावादीहरुलाई आततायी र विवेक शुन्य तत्वको संज्ञा दिँदै विगतमा निरंकुस राजतन्त्र सत्तामा हुँदा प्रेसलाई अंकुस लगाउने काम गरेको भन्दै राजावादीहरुको आक्रमणको निशाना पनि प्रेस नै भएको जिकिर गर्नुभयो । सत्य सूचना प्रवाह गरी अग्रगमन र स्थिरताको चेतना फैलाउने प्रेस जगत प्रतिगामी तत्वसँग सचेत बन्नुपर्ने उहाँको भनाइ छ ।
उहाँले भन्नुभयो, ‘निरंकुश राजावादी तत्वहरुले तीनकुनेमा एउटा आततायी र विवेक शुन्य आपराधिक घटनाहरु घटाउँदै थिए र नेपालको इतिहासमा क्रान्ति र प्रतिक्रान्ति अग्रमण र पश्चगमन फेरि एकचोटी नयाँ सन्दर्भसहित आपसमा टकराइ रहेका थिए । मैले आज बिहान धेरै मानिसहरुले मलाई सम्पर्क गरेर भन्नुभयो, तीनकुनेका जनताले पनि देशभर हजारौँको संख्यामा जनतालाई नउतारेको भए, लोकतन्त्र र गणतन्त्रप्रतिको आफ्नो कमिटमेन्टलाई नगरेको भए त्यतिमात्रै होइन अझ ठुला घटना घटाएर देशमा एउटा प्रतिक्रान्तिलाई त्यसको पराकाष्ठामा पुर्याउने षड्यन्त्र थियो ।
धेरैको ज्यान बच्यो, धेरै धनजनको क्षति हुनबाट पनि बच्यो । दुई जनाको ज्यान गयो, थुप्रै गाडीहरु घरहरु जलाइए । संघ संस्थाका कार्यालय, पार्टीका कार्यालय जलाइए । तर मलाई जनताले भनेको कुरा बुद्धिजीवीहरुले भनेको कुरा यदि समाजवादी मोर्चाले त्यो स्तरको गणतान्त्रिक शक्तिले त्यो स्तरको प्रदर्शन नगरेको भए आततायीहरुको योजना र रणनीति यो भन्दा भयानक थियो । त्यस्लाई रोक्यो भन्नुभएको छ भन्ने कुरा तपाईहरुसँग राख्न चाहन्छु । हिजोको विवेक शुन्य अपराधमा परेर एक जना पत्रकार सुरेश रजकको हत्या भयो घरभित्रै जलाएर हत्या गरियो ।
हिजो निरञ्कुस सत्ता हुँदा प्रेसमाथि अञ्कुस लगाउने उनीहरुको ध्यान हुन्थ्यो । आक्रमणको निशाना प्रेस नै हुन्थ्यो । हिजो राजावादी भन्नेहरुको आक्रमणको निसाना प्रेस नै थियो जसले सत्य तथ्य समाचार समाचार संप्रेसन गरेर जनतामा एउटा नयाँ चेतना अग्रगमन, शान्ति, विकास र स्थिरताको समृद्धिको चेतना फैल्याउँछ त्यही नै निरञ्कुसतावादीको सामन्ती तत्वहरुको निशाना हुने गर्छ हिजोको घटनाले पनि त्यस्लाई प्रष्ट पारेको छ ।’
अध्यक्ष दाहालले गणतन्त्रवादी दलहरुकाले लोकतन्त्रप्रतिको प्रतिवद्धता र संकल्प स्थापित गर्नका लागि ठूलो संख्याको जनसमुदायबीच विरोध सभा गरेर उदाहरण प्रश्तुत गरेको जिकिर गर्नुभयो । गणतन्त्रमाथि प्रहार भइरहेका बेलामा सरकारमा रहेका दलहरुले आफ्नो क्रियाकलाप सच्याएर गणतन्त्र बलियो बनाउने कार्यमा लाग्नुपर्ने उहाँको भनाइ छ ।
