काठमाडौँ : नाडा अटोमोवाइल्स एसोसिएसन अफ नेपालले सरकारले उद्योग व्यवसायलाई हेर्ने दृष्टिकोण अझै पनि सकारात्मक हुन नसकेको गुनासो गरेको छ ।
नाडा अध्यक्ष करण चौधरी नेतृत्वको टोलीले सोमबार उद्योग, वाणिज्य तथा आपूर्तिमन्त्री दामोदर भण्डारीलाई भेटेर यस्तो गुनासो गरेको हो । टोलीले भारतीय मालवाहक साधनहरुको नेपालमा निर्बाध प्रवेशले नेपालका मालवाहक साधनहरुको व्यवसायमा ठूलो असर परिरहेको भन्दै सरकारको ध्यानकर्षण गराएको थियो ।
भेटमा अध्यक्ष चौधरीले लुव्रिकेण्टस उद्योगका नाममा तयारी सामग्री नै नेपालमा ल्याएर बिक्री वितरण भइरहेकोले यसलाई रोक्नमाग गर्नुभयो । उहाँले उद्योग व्यवसाय गरेर आर्यआर्जन गर्न सकिने बातावरण निर्माणका लागि नाडाको ६ बुँदे लिखित सुझावसमेत प्रस्तुत गर्नुभयो ।
नाडाका उपाध्यक्ष राजनबाबु श्रेष्ठले एजेन्सी दर्तासम्बन्धी ऐन अहिलेसम्म पारित नहुँदा सवारी साधन पैठारीकर्ताहरुलाई ठूलो समस्या भइरहेकोले सो ऐन छिट्टै पारित गर्नका लागि आग्रह गरे ।
नाडाका महासचिव सुरेन्द्रकुमार उप्रेतीले नेपालका व्याट्री उद्योगहरुको अवस्थाबारे समेत जानकारी दिनु हुँदै हाल बन्द रहेको गोरखकाली रबर उद्योगलाई हालको ठाउँबाट कुनै उपयुक्त स्थानमा स्थानान्तरण गरी सञ्चालन गर्न सकिने र त्यस ठाउँलाई सेजको रुपमा प्रयोग गर्न सकिने बताउनु भयो ।
उद्योगमन्त्री भण्डारीले नाडाका सुझावहरु राजस्व परामर्श समितिमा समेत पठाउन आग्रह गर्नुभयो ।
