ललितपुर : परराष्ट्रमन्त्री डा आरजु राणा देउवाले कूटनीतिका माध्यमबाट खेलको विकास र विस्तार गर्न सकिने बताउँदै साहसिक खेलको विकास गर्न सकिए यो संसारकै लागि आकर्षणको केन्द्र बन्ने बताउनुभएको छ ।
नेपाल कराते महासंघ जिल्ला प्रमुख डोजो ललितपुरको आयोजनामा सञ्चालित चौथो कृष्णप्रसाद भट्टराई स्मृति राष्ट्रिय कराते प्रतियोगितामा पुरस्कार वितरण गर्दै उहाँले नेपालमा साहसिक खेलका माध्यमबाट खेल कूटनीतिको विकास र विस्तार गर्न सकिने सम्भावना आफूले देखेको जानकारी गराउनुभयो ।
हिजोआज खेलकुदको आकर्षण र महत्व विश्वव्यापी बढ्दै गइरहेकाले नेपालका हिमाल, पहाड, नदी तथा खोलाहरू साहसिक पर्यटनका लागि संसारमै प्रख्यात रहेका पनि स्पष्ट गर्नुभयो । गत अक्टोबरमा कतारको दोहामा आयोजना भएको एसीडीको तेस्रो सम्मेलनमा खेल कूटनीतिलाई प्रमुख विषयका रूपमा राखिएको स्मरण गर्दै उहाँले भन्नुभयो “कूटनीतिबाट पनि खेलको विकास गर्न सकिन्छ भन्ने कुरा मैले त्यहाँ बुझेँ र त्यहाँ उपस्थित धेरै देशका विदेशमन्त्रीहरुले विभिन्न खेलको नाम लिँदा मैले नेपालमा माउन्टनेयरिङ र ह्वाइट वाटर -याफ्टिङको विकास गर्ने प्रतिबद्धता व्यक्त गरेकी छु ।”
त्यसपछि नेपाल फर्किएर यस विषयमा आफूले खेलकूद क्षेत्र र सरकारी निकायका अधिकारीहरुसँग बैठक गरी नेपालमा माउन्टनेयरिङ र ह्वाइट वाटर -याफ्टिङको विकास र विस्तारको सम्भावनाका बारेमा पनि कुराकानी गरिसकेको जानकारी मन्त्री डा राणाले दिनुभयो ।
नेपालले विश्वका पर्यटकलाई यस क्षेत्रमा आकर्षित गरी साहसिक खेलका माध्यमबाट पनि खेल कूटनीतिको विकास र विस्तार गर्न सकिने भएकाले यस विषयमा नेपाली कांग्रेस र पार्टीको खेलकूद विभागमा पनि व्यापक मात्रामा छलफल गर्नुपर्ने उहाँको भनाई थियो ।
सो कार्यक्रममा मन्त्री डा राणाले नेपालामा साहसिक खेलकूदहरु विशेषगरी माउन्टनेयरिङ, ¥याफ्टिङ आदिमा विश्वका पर्यटककै रुचि बढ्दो देखिएको र यी क्षेत्रमा तालिम एवं कोर्षको व्यवस्थासमेत रहेकाले यसका माध्यमबाट पनि पर्यटक भित्र्याउन सकिने धारणा राख्नुभयो ।
नेपालको भौगोलिक अवस्थिति र प्राकृतिक सम्पदाका कारण यहाँ रहेको साहसिक खेलको सम्भावनालाई विश्वमै उजागर गर्न आवश्यक रहेको पनि उहाँको भनाई थियो । मन्त्री डा राणाले कृष्णप्रसाद भट्टराइजस्तो नेपालमा प्रजातन्त्र र नागरिक शासनका लागि जीवन आहुति दिनुभएका सन्त नेताको नाममा खेल प्रतियोगिता राखेकामा सो आयोजकहरुलाई धन्यवाद दिनुभएको थियो ।
