दमौली। १५ फागुनः मगर सङ्घ स्थापना भएको भूमिमा ४३औँ मगर सङ्घ स्थापना दिवस मनाइएको छ । विसं २०३९ फागुन १५ गते तनहुँको दमौलीमा नेपाल लाङ्घाली परिवार सङ्घको स्थापना भएको थियो । सोही दिनलाई मगर सङ्घले स्थापना दिवसको रुपमा मनाउँदै आएको छ ।
तनहुँ देशभरिमा सबैभन्दा धेरै मगरजाति बसोबास गर्ने जिल्लाका रुपमा चिनिन्छ । विसं २०३९ मा मगर सङ्घको पहिलो महाधिवेशन भए तापनि त्यस अघिदेखि नै मगरहरु विभिन्न ढङ्गले सङ्गठित हुँदै आएका थिए । विसं २०३९ फागुन १४, १५ देखि १६ गते तनहुँको दमौलीमा पञ्चायती व्यवस्थामा प्रहरी घेराबन्दीको बीचमा हजारौँ मगर समुदायको उपस्थितिमा ‘नेपाल लाङ्घाली परिवार सङ्घ’ को ऐतिहासिक प्रथम महाधिवेशन भव्यताका साथ सम्पन्न भएको थियो । विसं २०४८ को चौथो महाधिवेशनले ‘नेपाल लाङ्घाली परिवार सङ्घ’ लाई नाम परिवर्तन गरी ‘नेपाल मगर सङ्घ’ मा रूपान्तरण गरेको थियो ।
मगर सङ्घ स्थापनाको ४३औँ वर्षको अवसरमा तनहुँको दमौलीमा आज विविध कार्यक्रमसहित मगर सङ्घ स्थापना दिवस मनाइएको छ । दिवसका अवसरमा तनहुँका दशवटै पालिकाले आज सार्वजनिक बिदा दिएका थिए ।
दमौलीस्थित खुला मैदानमा आयोजित कार्यक्रममा विविध सांस्कृतिक कार्यक्रम आयोजना गरिएको थियो । कार्यक्रममा गण्डकी प्रदेशका सांसद एवं पूर्वअर्थमन्त्री जीतप्रकाश आलेले मगर समुदायको चेतनास्तर बढाउन आवश्यक रहेको बताउनुभयो । उहाँले मगर जाति सङ्गठित भएर अगाडि बढ्नुपर्ने बताउँदै भाषा, संस्कृति संरक्षणका लागि सक्रिय हुनुपर्नेमा जोड दिनुभयो ।
मगर सङ्घ गण्डकी प्रदेशका निवर्तमान अध्यक्ष एवं मगर सङ्घका केन्द्रीय निर्वाचन समिति संयोजक सिद्धान्त थापा मगरले समाज रुपान्तरणमा मगर समुदायको भूमिका अग्रणी रहँदै आएको बताउनुभयो ।
ऋषिङ गाउँपालिकाका अध्यक्ष राजेन्द्रकृष्ण श्रेष्ठले मगर समुदाय संस्कृति संरक्षणमा अब्बल रहेको धारणा राख्नुभयो । नेकपा (माओवादी) केन्द्रका वैकल्पिक केन्द्रीय सदस्य मदन आलेले मगर समुदाय देशको मूल प्रवाहबाट पछाडि परेको बताउनुभयो । घिरिङ गाउँपालिकाका अध्यक्ष होमबहादुर थापाले जातीय उत्थानका लागि मगर समुदाय एकजुट हुनुको विकल्प नरहेको चर्चा गर्नुभयो । रासस
