काठमाडौं । पुस महिनाका लागि वाणिज्य बैंकहरूले निक्षेपको ब्याजदर सार्वजनिक गरेका छन् ।
अघिल्लो महिनाको तुलनामा पुषमा व्यक्तिगत मुद्दती निक्षेपको ब्याजदर औसतमा ०.०४ प्रतिशतले बढेको छ । मंसिरमा अधिकतम व्यक्तिगत मुद्दतीको औसत ब्याजदर ५.९७ प्रतिशत रहेकोमा पुसमा ६.०१ प्रतिशत पुगेको छ।
पुस मा २० वाणिज्य बैंकमध्ये १४ बैंकले मंसिरकै ब्याजदरलाई निरन्तरता दिएका छन् । यस्तै, तीन वटा वाणिज्य बैंकले व्यक्तिगत मुद्दती निक्षेपको ब्याजदर बढाएका छन् भने ३ वटाले घटाएका छन् ।
ब्याजदर बढाउने बैंकहरुमा कृषि विकास बैंक, एनएमबि बैंक र प्राइम कमर्सियल बैंक रहेका छन् भने घटाउनेमा नेपाल बैंक, सानिमा बैंक र एनआईसी एशिया बैंक रहेका छन् ।
एसबीआई, प्रभु, माछापुच्छ्रे, नेपाल इन्भेस्टमेन्ट मेगा, ग्लोबल आईएमई, कुमारी, एभरेस्टलगायतका बैंकले यथावत राखेका छन् ।
