काठमाडौँ । च्याम्पियन्स लिग फुटबलमा जर्मन क्लब बायर्न म्युनिखले जित निकालेको छ । गएराति भएको खेलमा बायर्नले फ्रेन्च क्लब पेरिस सेन्ट जर्मेन (पिएसजी)लाई १–० गोलले हराएको हो ।
घरेलु टोलिलाई जित दिलाउन एकमात्र निर्णायक गोल खेलको ३८ औं मिनेटमा किम मिन जाईले गरे । यता, ५६ औं मिनेटमा ओस्माने डेम्बेलेले रातो कार्ड खाएपछि पिएसजी १० खेलाडीमा समेटिएको थियो ।
अंकतालिकाको ११ औं स्थानमा रहेको बायर्नको ५ खेलबाट ९ अंक छ भने पिएसजीले ५ खेलबाट ४ अंकमात्रै जोड्दै तालिकाको २६ औं स्थानमा छ ।
गएराति नै भएको अर्को खेलमा इंग्लिस क्लब म्यान्चेस्टर सिटी र डच क्लब फेयनुर्डले ३–३ गोलको बराबरी खेलेका छन् । घरेलु टोलि सिटीले ३ गोलको अग्रता समेत जोगाउन सकेन ।
खेलको ४४ औं (पेनाल्टी) र ५३ औं मिनेटमा एर्लिङ हालाण्डले तथा ५० औं मिनेटमा इल्काए गुन्डोवानले गोल गर्दै सिटीलाई ३–० को अग्रता दिलाएका थिए ।
तर, ७५ औं मिनेटमा अनिस मोउसा, ८२ औं मिनेटमा सान्टियागो गिमेनेज र ८९ औं मिनेटमा डेभिड हान्कोले गोल गर्दै फेयनुर्डलाई हारबाट जोगाए ।
सिटी ५ खेलबाट ८ अंकसहित तालिकाको १५ औं स्थानमा छ भने फेयनुर्ड ७ अंकसहित २० औं स्थानमा छ ।
