काठमाडौँ । पहिलो संस्करणको सिद्धार्थ बैंक नेपाल प्रिमियर लिग (एनपिएल)को ट्रफी सार्वजनिक गरिएको छ ।
धरहरा परिसरबाट नेपाल क्रिकेट संघ (क्यान)द्वारा आयोजित एक कार्यक्रमकाबीच प्रधानमन्त्री केपी शर्मा ओलीले एनपिएलको ट्रफी अनावरण गरेका हुन् ।
यसैबीच, ट्रफीमा राखिएको एक वस्तु अहिले चर्चाको विषय बनेको छ । सार्वजनिक ट्रफीको सबैभन्दा माथि एउटा ढुंगा रहेको छ । यही ढुंगा सामाजिक सञ्जालमा अहिले चर्चाको विषय बनेको हो ।
ट्रफीमा राखिएको ढुंगा सगरमाथा क्षेत्रस्थित कालापत्थरको रहेको क्यानले जनाएको छ । क्यानका सचिव पारस खड्काले नेपालको प्राकृतिक सम्पदाको संरक्षण गर्न ट्रफीमा ढुंगा राखिएको बताए । यो ट्रफीले नेपालको पर्यटन प्रवर्द्धनमा सहयोग पुर्याउने उनको भनाई छ ।
उनले भने– ‘सगरमाथाको काखमा रहेको कालापत्थरबाट ल्याइएको ढुंगा यस ट्रफीको मुख्य आर्कषणको रूपमा रहेको छ । एनपिएलको ट्रफीले नेपालको प्राकृतिक सम्पदाको प्रवर्द्धन गर्दै पर्यटनमा सहयोग पुर्याउने आशा राखेका छौँ । यसले हाम्रो प्राकृतिक सम्पदाको संरक्षण गर्न झकझक्याउनेछ ।’
निमा शेर्पा र मिङ्मा शेर्पाले कालापत्थर क्षेत्रबाट उक्त ढुंगा ल्याएका हुन् । उक्त पत्थर ल्याउन सहयोग गरेकामा यी दुई पर्वतारोहीलाई क्यानले सम्मान पनि गरेको छ ।
एनपिएल यही मंसिर १५ गतेदेखि आयोजना हुँदैछ ।
