काठमाडौँ । भारतीय अलराउन्डर हार्दिक पाण्ड्या आईसीसीको नयाँ वरियतामा विश्व नम्बर १ अलराउन्डर बनेका छन् ।
उनले इङ्ल्यान्डका लियाम लिभिङ्स्टनलाई पछि पारे । हार्दिक दुई स्थान छलाङ मार्दै शीर्षस्थानमा उक्लिएका हुन् । लिभिङ्स्टन दुई स्थान तल झर्दै तेस्रो स्थानमा पुगेका छन् । वरीयतामा नेपालका दिपेन्द्रसिंह ऐरी दोस्रो स्थानमा यथावत छन् ।
अलराउन्डर हार्दिक पाण्ड्याले हालै दक्षिण अफ्रिका विरुद्धको टी–२० सिरिजको दोस्रो खेलमा ३९ रनको अविजित इनिङ खेलेका थिए ।
जहाँ चौथो टी–२० खेलमा ८ रन दिएर १ विकेट लिएका थिए । जसका कारण उनी टी–२० अन्तर्राष्ट्रिय क्रिकेटमा नम्बर १ अलराउन्डर बने ।
हार्दिक पाण्ड्या अलराउन्डर वरीयताको शीर्ष स्थानमा पुगेको यो दोस्रो पटक हो । यस वर्षको टी–२० विश्वकपपछि उनले पहिलो पटक नम्बर एकको स्थान हासिल गरेका हुन् ।
