काठमाडौँ । स्टार फुटबलर लियोनल मेसी अर्को वर्ष अन्तर्राष्ट्रिय खेलका लागि भारत आउने भएका छन् । उनको राष्ट्रिय टोली अर्जेन्टिनाले केरला भ्रमण गर्नेछ । यो खेल जुन वा जुलाईमा हुनेछ ।
यद्यपी यो खेल कुन टिमसँग खेल्ने हो भने खुलाइएको छैन । यसअघि मेसी सन् २०११ मा अन्तर्राष्ट्रिय मैत्रीपूर्ण खेलका लागि भारत आएका थिए ।
केरलाका खेलकुद मन्त्री वी अब्दुरहिमानले बुधबार मेसीसहितको अर्जेन्टिनाको फुटबल टोलीले अर्को वर्ष अन्तर्राष्ट्रिय खेलका लागि राज्यको भ्रमण गर्ने बताए । अब्दुरहिमानले खेल प्रदेश सरकारको पूर्ण निगरानीमा हुने बताए ।
मेसीसहित अर्जेन्टिनाको फुटबल टोलीले पछिल्लो पटक २०११ मा भेनेजुएलाविरुद्धको अन्तर्राष्ट्रिय मैत्रीपूर्ण खेलका लागि भारत भ्रमण गरेको थियो । अर्जेन्टिना र भेनेजुएलाबीचको यो खेल सेप्टेम्बर २ मा कोलकाताको साल्ट लेक स्टेडियममा भएको थियो ।
यस खेलमा मेसीको सहयोगमा निकोलस ओटामेन्डीले दोस्रो हाफमा हेडर गोल गर्दै अर्जेन्टिनालाई १–० ले जित दिलाएका थिए ।
अर्जेन्टिना अहिलेको विश्व च्याम्पियन हो । सन् २०२२ मा भएको फिफा विश्वकपको फाइनलमा पेनाल्टी सुटआउटमा फ्रान्सलाई ४–२ ले पराजित गर्दै टोलीले उपाधि जितेको थियो । अर्जेन्टिनाले यसअघि सन् १९८६ मा उपाधि जितेको थियो ।
यो अर्जेन्टिनाको समग्रमा तेस्रो उपाधि हो । टोली सन् १९७८ मा पहिलो पटक विश्व च्याम्पियन बनेको थियो ।
