काठमाडौँ । नेपाल प्रिमियर लिग (एनपिएल) रोक्न माग गर्दै दायर भएको रिटमा सर्वोच्च अदालतले अन्तरिम आदेश जारी गर्न अस्वीकार गरेको छ
।
एनपिएल आफ्नो नाममा दर्ता भएको भन्दै जोरा स्पोर्टस म्यानेजमेन्टका तर्फबाट आमीर अख्तरले रिट दायर गरेका थिए । सो रिटमा न्यायाधीश हरिप्रसाद फुयाँलको एकल इजलासले विपक्षी नेपाल क्रिकेट संघ (क्यान)सँग लिखित जवाफ माग गरेको छ ।
पूर्वक्रिकेटर समेत रहेका अख्तरले रिट दायर गर्दा एनपीएल आयोजना रोक्न अन्तरिम आदेश पनि माग गरेका थिए । तर, सर्वोच्चले अन्तरिम आदेश भने दिएन । यो आदेशसँगै एनपीएल सञ्चालनका लागि बाटो खुला भएको छ ।
नेपाल क्रिकेट संघले १० वर्षका लागि एनपिएल सम्वन्धी सम्पूर्ण सर्वाधिकार आफूलाई दिएकाले अहिले अरू नै कम्पनीमार्फत सञ्चालन गर्न नमिल्ने आमीर अख्तरको भनाई छ । उनले क्यानले जानकारी नै नदिई अन्य कुनै कम्पनीलाई दिएको र भनेकै आधारमा सञ्चालन गर्न नमिल्ने जिकिर गरेका छन् ।
नेपालमा पहिलो पटक हुन लागेको फ्रेन्चायज क्रिकेट लिग एनपीएल आगामी मंसिर १५ देखि पुस ६ सम्म आयोजना हुँदैछ । एनपीएलमा कर्णाली याक, विराटनगर, जनकपुर, चितवन, काठमाडौं, पोखरा, लुम्बिनी र सुदूरपश्चिम गरी ८ टिम सहभागी छन् ।
