वासिङटनः अमेरिकी राष्ट्रपतिको निर्वाचन नयाँ मोडमा पुगेको छ । डेमोक्रेटिक पार्टीका तर्फबाट राष्ट्रपतिका प्रत्यासी जो बाइडेनले रिपब्लीकनको गढ मानिएका जोर्जिया र पेन्सिलभेनिया राज्यमा अग्रता बनाउनु भएको छ ।
पछिल्लो मतगणनामा बाइडेनले जोर्जिया राज्यमा राष्ट्रपति डोनाल्ड ट्रम्पभन्दा एक हजार ९७ मतले अग्रता बनाउनु भएको छ । यो राज्यमा सन् २००० यता रिपब्लीकन उम्मेदवारहरु विजयी हुँदै आएका थिए ।
जोर्जिया राज्यमा १६ इलेक्टोरल भोट छ ।
त्यस्तै पेन्सिलभेनिया राज्यमा पनि बाइडेनले ५,५८७ मतले अग्रता बनाउनु भएको छ । यो राज्य पनि रिपब्लीकन पार्टीको गढ हो । यहाँ पनि विगतमा रिपब्लीकन पार्टीका राष्ट्रपतिका उम्मेदवारहरु विजयी हुँदै आएका थिए ।
पेन्सिलभेनिया राज्यमा २० इलेक्टोरल भोट छ ।
अर्को निकै प्रतिस्पर्धी राज्य एरिजोना र नेभाडा हुन् । यी दुबै राज्यमा बाइडेनले अग्रता बनाउनु भएको छ । एरिजोनामा ४७ हजार र नेभाडामा ११ हजार ४३८ मतले बाइडेन अघि हुनुहुन्छ ।
हालसम्म बाइडेनले २५३ र ट्रम्पले २१३ इलेक्टोरल कलेज (निर्वाचक प्रतिनिधि) प्राप्त गरिसक्नु भएको छ । राष्ट्रपतिमा विजयी हुन २७० इलेक्टोरल कलेज प्राप्त गर्नु आवश्यक छ ।
हाल चार वटै राज्यहरु जोर्जिया, पेन्सिलभेनिया, एरिजोना (११) र नेभाडा () मा हाल हुलाकबाट प्राप्त भएका र विदेश वा अन्यत्र रहेका व्यक्तिले गरेका मतपत्र (एब्सेन्टी) को गणना भइरहेको छ । गणनाको रुझान हेर्दा बाइडेनलाई हुलाकबाट भारी मतदान भएकाले बाइडेन नै आगामी राष्ट्रपतिमा विजयी हुने सम्भावना देखिएको छ ।
पछिल्लो अग्रता बनाइरहेका राज्यमा बाइडेन विजयी भए बाइडेनले झण्डै ३०६ इलेक्टोरल कलेज सहित स्वतः राष्ट्रपति बन्नु हुनेछ ।
राष्ट्रपति ट्रम्पले भने निर्वाचनमा धाँधली भएको आरोप लगाउँदै सर्वोच्च अदालतमा निवेदन दिने धम्की दिइरहनु भएको छ । उहाँले आफूले निर्वाचनको परिणाम सहजै स्वीकार नगर्ने पटक पटक बताइरहनु भएको छ ।
यसअघि ट्रम्पका तर्फबाट मिचिगन, विस्कन्सिन, पेन्सिलभेनिया, एरिजोना राज्यमा मतगणनामा धाँधली भएको र आफ्ना प्रतिनिधिलाई मतगणना स्थलसम्म पहुँच नदिएको भन्दै राज्यका संघीय अदालतमा मतगणना रोक्न माग गरी निवेदन दिइएको थियो । तर न्यायाधीशहरुले मतगणनामा कुनै समस्या नदेखिएको र ट्रम्पका तर्फबाट प्रस्तुत प्रमाणहरु विश्वासयोग्य नभएको जनाउँदै मतगणना रोक्न नसकिने आदेश दिएका थिए । अदालतको आदेश नआएको अवस्थामा मतगणना निरन्तर जारी रहेका छन् ।
के अब सर्वोच्च अदालतले संघीय अदालतको फैसला उल्टाउँदै पुनः मतगणना गर्न आदेश देला ? स्वयं रिपब्लीकन पार्टीका कतिपय नेताले ट्रम्पको शैली स्वागतयोग्य नरहेको बताएका छन् तर केही समर्थकले ट्रम्पको पक्षबाट देशव्यापी आन्दोलन र मुद्दामामिला लड्न भन्दै चन्दा संकलन अभियान थालेका छन् । (सिएनएन)
