बाँके। कोरोना भाइरसको संक्रमणबाट बाँकेमा बर्दियाका दुईजना र दाङका एकजना संक्रमितको मृत्यु भएको छ । पछिल्लो २४ घण्टामा बर्दियाका २९, ३५ र दाङका ६४ वर्षीय पुरुषको मृत्यु भएको हो ।
कात्तिक २३ गते साँझ नेपालगन्ज मेडिकल कलेज शिक्षण अस्पताल कोहलपुरमा भर्ना भएका बर्दिया ठाकुरद्वारा नगरपालिका–२ का २९ वर्षीय पुरुषको सोमबार दिउँसो पौने २ बजे मृत्यु भएको र सोही दिन साँझ ६ बजे कोरोना पोजेटिभ रिपोर्ट आएको बाँकेका फोकल पर्सन नरशेबाबु श्रेष्ठले बताए । श्रेष्ठका अनुसार मृतकमा निमोनियाको समस्या थियो ।
यस्तै वेस्टर्न अस्पताल नेपालगन्जमा कात्तिक २३ गते साँझ भर्ना भएका बर्दियाकै बाँसगढी नगरपालिका( ८ का ३५ वर्षीय पुरुषको सोमबार साँझ ५ बजे कोरोना संक्रमण पुष्टि भएको र राति सवा ८ बजे उनको मृत्यु भएको हो ।
यस्तै भेरी अस्पताल नेपालगन्जमा सोमबार बिहान अस्पताल भर्ना भएका दाङ घोराही उपमहानगरपालिका–१५ का ६४ वर्षीय पुरुषको गएराति साढे ९ बजे मृत्यु भएको हो । उनको कोरोना परीक्षण रिपोर्ट भने राति १० बजे आएको हो ।
बाँकेका अस्पतालहरुमा बाहिर जिल्लाबाट उपचारका लागि आएका कोरोना संक्रमितको मृत्यु हुने संख्या ३२ पुगेको कोभिड संकट व्यवस्थापन केन्द्र बांकेले जनाएको छ ।
