काठमाडौँ । नेपाली कांग्रेसका सभापति शेरबहादुर देउवालाई महामन्त्री विश्वप्रकाश शर्माले सरकारको नेतृत्व दोश्रो तहका नेतालाई हस्तान्तरण गर्न आग्रह गर्नुभएको छ । पार्टीको केन्द्रीय कार्यसमितिको बैठकमा शर्माले राख्नु भएको प्रस्ताब सभापति देउवाले ठाडै अस्वीकार गर्नुभएको छ ।
२०८३ मा देउवा प्रधानमन्त्री नबनी पार्टीको १५ औँ महाधिवेशन गर्नु उपयुक्त नहुने भनी तर्क भइरहेका बेलामा शर्माले देउवा प्रधानमन्त्री बन्ने र महाधिवेशन गर्ने विषय फरक भएको भन्दै यसलाई अन्तरसम्बन्धित बनाउन नहुने बताउनु भयो ।
बैठकमा महामन्त्री शर्माले भन्नुभयो- प्रतिनिधिसभामा कांग्रेसबाटै एक से एक अग्रज नेता हुनहुन्छ उहाँहरुमध्ये कसैलाई प्रधानमन्त्री बनाऔं ।
शर्माले डा.शेखर कोइराला, विमलेन्द्र निधि, प्रकाशमान सिंह, पूर्णबहादुर खड्का, डा शशांक कोइराला र अर्जुननरसिंह केसीमध्ये एकलाई प्रधानमन्त्री बनाउन देउवालाई सुझाव दिनुभयो
‘उहाँहरु मध्ये कसैलाई पनि हामीले प्रधानमन्त्री बनायौं भने – एक, सभापतिको त्याग देखिन्छ । दुई, उहाँको समकालीन कोही नेतालाई न्याय र कदर हुन्छ । तीन, तब ०८४ पछि हामी नयाँ अनुहारमा पुग्नेछौं’, शर्माले भने ।
बैठकमा महामन्त्री शर्माले भन्नुभयो ‘८१ सालमा छौँ हामी सत्ता व्यवस्थापन गर्नुस्, ८२ सालमा सबै तहको अधिवेशन र महाधिवेशन गर्न सकिन्छ । किनभने हिंसा पनि छैन, कोरोना पनि छैन । भूकम्प पनि छैन । ८२ मा गर्न सकेनौँ भने ८३ को बैशाखमा शुरु गरेर असारमा सरकारको नेतृत्व हामीलाई हस्तान्तरण हुने कुरा छ हाम्रो सभापतिज्यूलाई त्यो सकेर भदौमा शुरु गर्दा स्थानीय तहको निर्वाचनमा जान केबल सात महिनामात्र बाँकी रहन्छ । नयाँ आउनु भएको सभापतिलाई सात महिना पनि नदिने रु अहिलेको कार्यतालिकाको सन्दर्भमा महासमितिले निर्णय गर्ने होइन । के सोचाइ राखौँ भने सक्छौँ ८२ मा गरौँ । सक्दैनौँ भने ८३ बैशाखमा शुरु गरेर सरकारको नेतृत्व हस्तान्तरण असारमा हुन्छ त्यसको तीन महिनापछि त महाधिवेशन गरौँ न । कम्तीमा सात महिनाको समय नयाँ सभापतिलाई नयाँ कार्यसमितिलाई रहन्छ ।’
उहाँले भन्नुभयो ‘दुई कार्यकाल निरन्तर सभापति भएर तेस्रो पटक हुन पाइँदैन । एक पटक ग्याप गर्नुपर्छ । त्यस्तै स्थानीय तहको प्रमुख निरन्तर दुई पटक हुन पाइन्छ । संविधानले राष्ट्रपति दुई पटक हुन पाउने भनेको छ त्यसलाई एक पटक बनाउँ । सानो सानो सुधार कांग्रेसको नेतृत्व हुनुपर्छ । यसलाई हामीले फरक ढंगले सोच्नुपर्छ ।’
शर्माले बोलिरहँदा सभापति देउवाले भने उहाँको भनाईको प्रतिबाद गर्दे अस्वीकार गर्नुभएको हो ।
