काठमाडौँ । भारतीय क्रिकेटर शिखर धवनले अन्तर्राष्ट्रिय क्रिकेटबाट सन्यासको घोषणा गरेका छन् । उनले सामाजिक सञ्जाल ‘एक्स’ मार्फत घरेलु तथा अन्तर्राष्ट्रिय क्रिकेटलाई अलविदा भनेका हुन् ।
३७ वर्षीय खेलाडीले सन् २०१० मा भारतका लागि डेब्यु गरेका थिए । आफ्नो १३ वर्षको करियरमा उनले ३४ टेस्ट, १६७ एकदिवसीय र ६८ टी–२० खेलमा भारतको प्रतिनिधित्व गरेका छन् ।
‘टीम इन्डियामा खेलेपछि मैले तपाईंका माया पाएको छु । तर कथामा अगाडि बढ्नका लागि पाना पल्टाउनुपर्ने भनाइ छ । म पनि त्यही गर्न जाँदैछु । मेरो क्रिकेट यात्राको यो अध्याय बन्द गर्दा, म अनगिन्ती सम्झना र कृतज्ञता लिएर जान्छु । माया र समर्थन को लागी धन्यवाद जय हिन्द ।’ उनले भनेका छन् ।
धवनले आफ्नो पहिलो टेस्ट अष्ट्रेलियाविरुद्ध मोहालीमा खेलेका थिए । सन् २०१३ देखि अहिलेसम्म ३४ वटा टेस्टमा सहभागी भइसकेका छन् । धवनले अन्तिम पटक सन् २०१८ मा टेस्ट खेल्ने मौका पाएका थिए । उनले क्रिकेटको सबैभन्दा लामो फर्म्याटमा ४०.६१ को औसतमा २३१५ रन बनाएका छन् । यस अवधिमा उनले सात शतक र पाँच अर्धशतक प्रहार गरे । धवनको सर्वाधिक रन १९० रहेको छ ।
शिखरले भारतका लागि आफ्नो पहिलो ओडीआई सन् २०१० मा अस्ट्रेलियाविरुद्ध विशाखापट्टनममा खेलेका थिए । उनले १६७ खेलमा ६७९३ रन बनाएका छन् । धवनले ४४.११ को औसत र ९१.३५ को स्ट्राइक रेटमा रन बनाएका छन् । उनको नाममा १७ शतक र ३९ अर्धशतक छ । आफ्नो टी–२० करियरको कुरा गर्दा धवनले ६८ खेलमा १७५९ रन बनाएका छन् । उनले आफ्नो ब्याटबाट ११ अर्धशतक बनाएका छन् ।
धवनले आईपीएलमा पनि धेरै रन बनाएका छन् । उनी यस प्रतियोगिताको इतिहासमा सबैभन्दा सफल ब्याट्सम्यानमध्ये एक हुन् । उनी विराट कोहलीपछि सबैभन्दा धेरै रन बनाउनेमा दोस्रो स्थानमा छन् । धवनले आईपीएलका २२२ खेलमा ६७६९ रन बनाएका छन् । यस अवधिमा उनले २ शतक र ५१ अर्धशतक बनाएका छन् । धवनको औसत ३५.२६ र स्ट्राइक रेट १२७.१४ छ ।
धवनले आफ्नो अन्तिम अन्तर्राष्ट्रिय खेल १० डिसेम्बर २०२२ मा बंगलादेशविरुद्ध खेलेका थिए । एकदिवसीय ढाँचाको यो खेल चटगाउँमा खेलिएको थियो । यो खेलमा धवनले तीन रन मात्रै बनाउन सके । त्यस्तै धवनले आफ्नो अन्तिम टी–२० खेल २९ जुलाई २०२१ मा कोलम्बोमा श्रीलंका विरुद्ध खेलेका थिए । उनले यो खेलमा खाता पनि खोल्न सकेनन् । धवनले आफ्नो अन्तिम टेस्ट सेप्टेम्बर २०१८ मा ओभलमा इङ्ल्यान्डविरुद्ध खेलेका थिए । यस खेलका दुवै इनिङ्समा तीन र एक रन बनेका थिए ।
