काठमाडौं । संघीय संसदले कोभिड–१९ संक्रमणका बीच संसद चलाउने बारे विज्ञहरुसँग छलफल गरेको छ । बुधबार संसद सचिवालयले काठमाडौंमा विज्ञहरुसँग छलफल गरेर संसद चलाउने उपायको खोजी गरेको हो । सचिवालयले सरुवारोग विशेषज्ञ डा. शेरबहादुर पुन र जनप्रशासन विज्ञ एवं पूर्व सांसद जनकराज जोशीसँग छलफल गरेको हो । छलफलमा सरुवा रोग विशेषज्ञ डा. पुनले सतर्क भएर स्वास्थ्य मापदण्ड पुरा गरेर संसदको बैठक चलाउन सकिने बताउनुभयो । भौतिक दुरी र स्वास्थ्य मापदण्ड इमान्दारीसाथ पालना गर्न पनि आग्रह गर्नुभयो ।

छलफलमा जनप्रशासन विज्ञ एवं पूर्व सांसद जोशीले सदनको बैठक थोरै सांसदको उपस्थितिमा चलाउन सक्ने गरी व्यवस्था गर्न आवश्यक रहेको बताउनुभयो । सदनको बैठकमा भौतिक दुरी कायम गर्ने, मास्क लगाउने, हात धुने व्यवस्थालाई कडाईका साथ पालना गर्न सके बैठक चलाउँदा कुनै समस्या नहुने बताउनुभयो । दुरीको पालना हुन नसक्ने तथा लामो छलफल हुने अवस्थामा हाइव्रिड तरिकाले संसद चलाउन सकिने सुझाव पनि जोशीले दिनुभयो । अहिलेको नियमावलिमा हाइव्रिड संसद बारे केही व्यवस्था नभएकोले सभामुखले एक संकल्प प्रस्ताव ल्याएर तत्काल निकाश दिन सक्ने पनि बताउनुभयो । छलफलमा विज्ञहरुले संसद चलाउने विषयमा राजनैनिक दलहरुबीच मतैक्यता हुन आवश्यक रहेको पनि बताएकाछन् ।