काठमाडौँ । युरो कप २०२४ फुटबल प्रतियोगिताको फाइनल आज हुँदैछ ।
आज मध्यरातमा जर्मनीको बर्लिनस्थित ओलम्पियास्टेडिनमा हुने फाइनल खेलमा उपाधिका लागि स्पेन र इंग्ल्याण्डबीच प्रतिस्पर्धा हुँदैछ । खेल नेपाली समयानुसार राति १२ः४५ बजे सुरु हुनेछ ।
जारी प्रतियोगितामा स्पेन र इंग्ल्याण्ड दुबै अपराजित रहेका छन् । इंग्ल्याण्डले दुई खेल बराबरी खेल्दा स्पेनले भने सबै खेल जित्दै फाइनल पुगेको हो ।
अन्तिम १६ मा स्पेनले जर्जियालाई ४–१ गोलले हराउँदै क्वाटरफाइनलमा प्रवेश गरेको थियो । यस्तै, क्वाटरफाइनलमा जर्मनीलाई २–१ ले हराएको स्पेनले सेमिफाइनलमा फ्रान्समाथि २–१ गोलको जित निकाल्दै फाइनलमा स्थान पक्का गरेको हो ।
अर्कोतर्फ इंग्ल्याण्डले अन्तिम १६ मा स्लोभाकियालाई २–१, क्वाटरफाइनलमा स्वीट्जरल्याण्डलाई पेनाल्टीमा ५–३ तथा सेमिफाइनलमा नेदरल्यान्ड्सलाई २–१ गोलले हराउँदै फाइनलमा पुगेको हो ।
स्पेन आजको फाइनल जितेर चौंथो पटक उपाधि जित्ने दाउमा छ । उसले सन् १९६४, २००८ र २०१२ मा उपाधि जितेको छ ।
यसअघिको संस्करणमा उपविजेतामा चित्त बुझाएको इंग्ल्याण्ड भने पहिलो उपाधि उठाउने दाउमा छ ।
यी दुई टोलीबीच हालसम्म २७ खेल भएको छ । जसमा इंग्ल्याण्डले १४ खेल जित्दा १० खेलमा स्पेन विजयी भएको छ । यस्तै, ३ खेल बराबरी भएका छन् ।
