एजेन्सी । आईसीसी टी–२० विश्वकप २०२४ मा सुपर–८ को छैटौं खेल जुन २२ मा दुई आयोजक वेस्ट इन्डिज र अमेरिकाबीच हुँदैछ । खेल नेपाली समयानुसार शनिबार बिहान सवा ६ बजे केन्सिङ्टन ओभल बार्बाडोसमा सुरु हुनेछ ।
दुवै टोली पहिलो पटक टी–२० अन्तर्राष्ट्रिय खेलमा आमनेसामने हुँदैछन् । वेस्ट इन्डिजले दुई पटक टी–२० विश्वकपको उपाधि जितेको छ ।
अमेरिकाले पहिलो पटक विश्वकप खेल्दैछ । तर, विन्डिजले अमेरिकालाई हल्का रूपमा लिने छैन, किनभने अमेरिकाले समूह चरणमा पाकिस्तानजस्तो ठूलो टोलीलाई हराएर निराश बनाएको थियो ।
समूह–२ मा वेस्ट इन्डिज र अमेरिकाले आफ्नो पहिलो खेलमा हार बेहोरेका थिए अर्थात सेमिफाइनलमा पुग्न दुवैलाई अन्तिम दुई खेल जित्नै पर्ने हुन्छ । शनिबारको खेलमा जित्ने टोलीको आशा कायमै रहने छ भने हार्ने टोली दौडबाट बाहिरिने छ ।
दुई टोली अन्तर्राष्ट्रिय क्रिकेटमा एकपटक आमनेसामने भएका थिए । यो एकदिवसीय विश्वकपको क्वालिफायर खेल थियो । यस खेलमा वेस्ट इन्डिजले अमेरिकालाई ३९ रनले पराजित गरेको थियो । खेलमा जेसन होल्डरले ५६ रन बनाएका थिए भने १ विकेट पनि लिएका थिए ।
प्लेयर्स टु वाचः
वेस्ट इन्डिज –
निकोलस पूरनः टोली र प्रतियोगितार्कै शीर्ष स्कोरर । उनले ५ खेलमा १४१.८४ को स्ट्राइक रेटमा २०० रन बनाएका छन् ।
अकिल हुसेनः हुसेनले प्रतियोगिताको ५ खेलमा ९ विकेट लिएका छन् । उनी टोलीका सर्वाधिक विकेट लिने खेलाडी हुन् । यस अवधिमा उनको उत्कृष्ट ११ रनमा ५ विकेट हो ।
अमेरिका –
एन्ड्रियास गोउसः प्रतियोगिता दोस्रो तथा टोलीको शीर्ष स्कोरर । उनले ४ खेलमा १८२ रन बनाएका छन् ।
सौरभ नेत्रावलकरः अमेरिकाका बलर सौरभ नेत्रावलकरले ४ खेलमा ६ विकेट लिएका छन् । उनी अमेरिकाका लागि टी–२० अन्तर्राष्ट्रिय र प्रतियोगिताहरूमा सबैभन्दा बढी विकेट लिने खेलाडी हुन् ।
