काठमाडौं । काठमाडौं महानगरपालिकाले सडक निर्माण गर्दा तान्त्रिक युद्धको कथामा आधारित प्राचीन स्थल भेटिएको छ ।
नक्सालमा सडक निर्माण गर्दा छोपिएका भैरवलाई सडक खनेरै निकालिएको हो । यो स्थान ऐतिहासिक परम्परागत स्थल हो ।
यो ठाउँका बारेमा विभिन्न जनश्रुति छन् । स्थानीयवासी शंकराचार्य र अमर वाणाको तान्त्रिक युद्धको जनश्रुतिमा आधारित कथा सुनाउँछन् ।
यसको स्थापना, धार्मिक, सामाजिक सम्बन्धका विषयमा लेख, अभिलेख, शिलालेख वा तस्विर जस्ता प्रमाण प्राप्त हुन सकेको छैन ।
भैरव राखिएको खाडल, खाडलका प्रयोग भएको इटाको गारो, गारोका बिच बिचमा भएका खोपाहरुले भने प्राचीन कालमा यसको स्थापना भएको मान्न सकिन्छ ।
वडाध्यक्ष भरतलाल श्रेष्ठ भन्नुहुन्छ, ‘लिखित प्रमाण छैन । पाका मानिसहरुले यो ठाउँका बारेमा जानकारी दिँदै, शंकराचार्य र अमर वाणाका बिचमा तान्त्रिक शक्तिका विषयमा भएको विवादले सिर्जना गरेको युद्धको कथा सुनाउँछन् ।’
