काठमाडौं । कतारका अमिर (राजा) सेख तमिम बिन हमाद अल थानी मंगलबार नेपाल आउने हुनुभएको छ । राष्ट्रपति रामचन्द्र पौडेलको निमन्त्रणामा कतारका राजा नेपाल आउन लाग्नुभएको हो । कतारका राजाको यो पहिलो भ्रमण हो ।
परराष्ट्र मन्त्रालयले दुई दिनको राजकीय भ्रमणका लागि कतारका राजा नेपाल आउन लाग्नुभएको जनाएको छ । नेपालमा रहँदा उहाँले राष्ट्रपति पौडेलसँग शीतल निवासमा द्विपक्षीय भेटवार्ता गर्नुहुने कार्यसूची छ । सोही अवसरमा राष्ट्रपति पौडेलले कतारका राजाको सम्मानमा राजकीय भोजको आयोजना गर्नुहुने भएको छ ।
राजा सेख तमिमले बुधबार प्रधानमन्त्री पुष्पकमल दाहालसँग द्विपक्षीय भेटवार्ता गर्नुहुने कार्यसूची छ । वार्तापछि दुवै नेताले द्विपक्षीय सम्झौता र समझदारी पत्रमा हस्ताक्षर गर्ने कार्यक्रममा संयुक्त रूपमा सहभागी हुनु हुने मन्त्रालयले जनाएको छ । उहाँ बुधबार राति नै नेपालबाट स्वदेश फर्कनु हुने कार्यक्रम छ ।
कतार न्यूज एजेन्सीले एसियाली मुलुकको भ्रमणमा निस्केका राजाले सम्बन्धित मुलुकका नेता तथा वरिष्ठ पदाधिकारीहरुसँग सहकार्य अभिवृद्धि गर्ने तथा विभिन्न क्षेत्रमा सम्झौता र समझदारीपत्रमा हस्ताक्षर हुने उल्लेख गरेको छ ।
तीन एसियाली मुलुकको भ्रमणका लागि गत आइतबार दोहाबाट फिलिपिन्स उडेका राजा बंगलादेश हुँदे नेपाल आउन लाग्नुभएको हो ।
यो भ्रमणले नेपाल र कतारबीच रणनीतिक विकास साझेदारका रुपमा विकास गर्न सहयाेग पुग्छ । नेपालको पर्यटन, जलविद्युत् स्वास्थ्य, शिक्षा, खेलकुद, श्रम, संस्कृतिलगायतका क्षेत्रमा दिपक्षीय समझदारी गर्ने गरी तयारी भइरहेको छ ।
