एजेन्सी । विगत ४ दिनदेखि पाकिस्तान, अफगानिस्तान र धेरै खाडी मुलुकमा परेको वर्षाका कारण अवस्था बिग्रिएको छ । युएईमा वर्षाले ७५ वर्षको कीर्तिमान तोडेको छ ।
दुबईमा बाढीको अवस्थालाई ध्यानमा राख्दै त्यहाँ उपस्थित विभिन्न दूतावासले हेल्पलाइन नम्बर जारी गरेका छन् ।
यसैबीच पाकिस्तान र अफगानिस्तानमा वर्षाका कारण आएको बाढीमा हालसम्म १३५ जनाको मृत्यु भएको छ । जसमध्ये अफगानिस्तानमा ७० र पाकिस्तानमा ६५ जनाको मृत्यु भएको छ । ओमानमा पनि बाढीका कारण २० जनाको मृत्यु भएको छ ।
दुबईमा पछिल्लो २४ घण्टामा १५.२ सेन्टिमिटर पानी परेको मिडिया रिपोर्टले जनाएको छ । मंगलबार यहाँ १० इन्चभन्दा बढी पानी परेको थियो । बीबीसी न्यूजका अनुसार बुधबार दुबई अन्तर्राष्ट्रिय विमानस्थलबाट आउने र जाने ३०० उडान रद्द गरिएको छ ।
विमानस्थल प्राधिकरणले मानिसहरूलाई त्यहाँ नआउन सल्लाह दिएको छ । अर्कोतर्फ ओमानमा वर्षाका कारण १४ सय जनालाई शरणमा पठाइएको छ । विद्यालय र सरकारी कार्यालयहरु बन्द भएका छन् ।
युएईको अबुधाबी, दुबई र अल ऐन जस्ता सहरमा भारी वर्षाका कारण बाढीको अवस्था छ । यसबाट हालसम्म १ जनाको मृत्यु भएको छ । त्यहाँ पूरै वर्षको पानी २ दिनमै पर्यो । मंगलबार सडक, रेल र उडान प्रभावित भएका छन् । यी सहरहरूमा कार्यालय र विद्यालयहरू बन्द गरिएका छन् । मानिसहरूलाई घरबाट काम गर्न भनिएको छ ।
