एजेन्सी । मुम्बई इन्डियन्सले रोहित शर्माको स्थानमा हार्दिक पाण्ड्यालाई कप्तान बनायो । कप्तान फेरेपछि मुम्बई इन्डियन्सको व्यवस्थापनमा धेरै प्रश्नहरु उठाएका छन् । यस बाहेक हार्दिक पाण्ड्यालाई फ्यानहरुको क्रोधको सिकार पनि बन्नुपर्यो । तर, हार्दिकले ड्रेसिङ रुममा खेलाडीसँग कस्तो व्यवहार गर्छन् ? यसबारे मुम्बई इन्डियन्सका खेलाडी टिम डेभिडले बयान दिएका छन् ।
रोयल च्यालेन्जर्स बैंगलोरसँगको खेलअघि टिम डेभिडले हार्दिक पाण्ड्याले टोलीका लागि महत्वपूर्ण भूमिका खेलिरहेको बताएका छन्। उनले भने, ‘जब हामी दिल्ली क्यापिटल्ससँग संघर्ष गरिरहेका थियौं, हार्दिक पाण्ड्याले इनिङ्सको जिम्मा लिए, जसको फाइदा रोमारियो शेफर्डले उठाए।’ मुम्बईको जितमा रोमारियोले अन्तिम १० बलमा ३९ रन बनाएका थिए ।
हार्दिक पाण्ड्याले सम्पूर्ण टोलीलाई ‘ग्लू’ जस्तै राखेका टिम डेभिडले बताए । उनले भने, ‘हार्दिक पाण्ड्याले सम्पूर्ण टोलीलाई ‘ग्लू’ जस्तै राखेका छन् । त्यसैले हामीले अन्तिम ओभरमा फाइदा लिन सफल भयौं।’ हार्दिक पाण्डेयले टोलीका खेलाडीलाई साथमा लिएर काम गरिरहेको र कप्तानको हैसियतमा सम्पूर्ण टिमलाई एकजुट बनाएका उनले बताए ।
मुम्बई इन्डियन्सले दिल्ली क्यापिटल्स विरुद्ध सिजनको पहिलो जित हात पारेको थियो। मुम्बई इन्डियन्सको जितमा टिम डेभिडले २१ बलमा नटआउट ४५ रन बनाएका थिए । टस जितेर पहिले ब्याटिङ गरेको मुम्बई इन्डियन्सले २० ओभरमा ५ विकेट गुमाएर २३४ रन बनाएको थियो ।
मुम्बई इन्डियन्सले चार खेलमा तीन खेल हारेको छ भने एउटा जितेको छ । मुम्बई अंकतालिकाको आठौँ स्थानमा छ । मुम्बईले आज बेलुका ७:४५ बजे वानखेडे स्टेडियममा रोयल च्यालेन्जर्स बेंगलुरुको सामना गर्दैछ ।
