काठमाडौँ । नागरिक उन्मुक्ति पार्टीका संरक्षक रेशम चौधरीले आफूलाई जेल हालेर सत्ताको हालिमुहाली गर्ने षड्यन्त्र भएको भन्दै आपत्ति जनाएका छन् ।
पार्टीका केन्द्रीय सदस्य रमेश विश्वकर्माले आफूमाथि लगाएको आरोपको खण्डन गर्दै संरक्षक चौधरीले आफूबाट ज्यान मार्ने धम्की दिएको भन्ने निराधार रहेको समेत प्रतिक्रिया दिएका छन् ।
विश्वकर्माले आफूहरुको हत्या गर्नेसम्मको धम्की चौधरीबाट आएको आरोप लगाएका थिए । यस्तै चौधरीले चैत २३ र २४ हुने केन्द्रिय समितिको बैठकले जे निर्णय गर्छ त्यही स्वीकार हुने उनले दाबी गरे ।
चौधरीले सामाजिक सञ्जालमा लेखेका छन् – पार्टीको बैठकमा कस्ले कसलाई हातपात गर्यो ? ज्यान मार्ने धम्कि कसले दियो ? सुन्ने हेर्ने साथीहरू साक्षी छन् । जसरी पनि मलाई जेल हालेर सत्ताको हालिमुहाली गर्ने स्वार्थीहरुको पछाडी हामी लाग्दैनौँ । अनावश्यक हो–हल्लाको पछि नलागौँ । चैत २३ र २४ हुने केन्द्रिय समितिको बैठकले जे निर्णय गर्छ त्यही स्वीकार्ने हो । पार्टी कसैको पेवा होइन पहिचान बादीहरुको साझा आवाज हो ।
