काठमाडौं । नेपाली सिनेमा क्षेत्रकी निकै परिचित अभिनेत्री करिश्मा मानान्धरले नेपालका केही पुरुषहरुको मानसिकतामा यौन अपराध थुप्रिएको बताएकी छिन् । बैतडीकी किशोरी भागरथी भट्टको हत्याको विषयमा आफ्नो धारणा व्यक्त गर्दै अभिनेत्री मानान्धरले नेपालका केही पुरुषहरुको मानसिकतामा यौन अपराध थुप्रिएकोले बारम्बार यौन अपराध भईरहेको बताएकी हुन् ।
सामाजिक सञ्जालमा आफ्नो धारणा राख्दै अभिनेत्री मानान्धरले यो एक विकराल सामाजिक समस्या रहेकधो र यसलाई समयमा नै समाधान गर्नु जरुरी रहेको पनि बताएकी छिन् । साथै अभिनेत्री मानान्धरले समाजलाई शिक्षित, नैतिक, अनुशासित, सभ्य र सद्भावपूर्ण बनाउनबाट हामी आफै पनि चुकिरहेका छौँ, कि ? भनेर प्रश्न समेत गरेकी छिन् ।
गत बुधबार (माघ २१ गते) विद्यालय गएकी बैतडी दोगडाकेदार–७ चडेपानीकी १७ वर्षीया भागरथी भट्टको शव बिहीबार (माघ २२ गते) बीभत्स अवस्थामा फेला परेको थियो । परिवार र आफन्त उनको बलात्कारपछि हत्या भएको निष्कर्षमा पुगेका छन् । हत्याबारे थप अनुशन्धान भईरहेको छ ।
अभिनेत्री करिश्मा मानान्धरले यस्तो लेखेकी छिन् –
''बैतडीमा १७ वर्षीय किशोरीकाे बलात्कारपछि हत्या !
नेपालका केही पुरुषहरुकाे मानसिकतामा याैन अपराध थुप्रिएकाे छ । त्यसैले बारम्बार याैन अपराध भईरहेका छन् । याे एक विकराल सामाजिक समस्या हाे । यसलाई समयमा नै समाधान गर्नु जरुरी छ । राजनीतिक दल, मानव अधिकारकर्मी, सामाजिक धार्मिक अभियन्ता, नागरिक समाज, कलाकार, समाजसेवीहरु सबैले मिलेर समाजमा सभ्य, अनुशासित, नैतिक र सद्भावपुर्ण वातावरण सिर्जना गर्नेतर्फ पाईला चाल्नुपर्याे । समाजलाई शिक्षित, नैतिक, अनुशासित, सभ्य र सद्भावपूर्ण बनाउनबाट हामी चुकिरहेका छाैँ, कि?''
