काँग्रेस सांसद रायमाझीको आरोप: सरकार जनताप्रति जवाफदेही भएन

काठमाडौँ । नेपाली काँग्रेसबाट राष्ट्रिय सभाका सांसद रमेशजंग रायमाझीले सरकारले जनताप्रति जवाफदेही बन्न नसकेको आरोप लगाउनुभएको छ ।

सोमवारको राष्ट्रिय सभाको बैठकमा बोल्दै उहाँले यस्तो बताउनुभएको हो । उहाँले निर्वाचित भइसकेपछि जनतातिर फर्किन नसकेको बताउनु भयो । उहाँले सरकारले एउटा कानले सुन्ने र अर्को कानले उडाउने मात्रै काम गरिहरेको बताउनु भयो । उहाँले सरकारले गरेका निर्णय ६ महिनापछि उल्टिरहेको बताउनु भयो ।

उहाँले संसद सांसदले बोल्नै मात्रै थलो हो की बोलेका कुरा सरकारले चासो दिएर सुन्नुपर्छ भन्दै प्रश्न गर्नुभयो । उहाँले राष्ट्रिय सभाबाट उत्पत्ति भएको राष्ट्रिय मर्यादासम्बन्धी विधेयक प्रतिनिधि सभाबाट तुहिने अवस्थामा पुगेको बताउनु भयो । उहाँले प्रतिनिधि सभाले राष्ट्रिय सभाबाट सर्वसम्मत पारित भएको विधेयक तुहाउने काम गर्ने हो भने संघीय संसदको गरिमा के हुन्छ ? भन्दै प्रश्न गर्नुभयो ।

उहाँले भन्नुभयो, ‘राष्ट्रिय सभाबाट उत्पत्ति भएको एउटा विधेयक जुन मर्यादा विधेयक यहाँबाट सर्वसम्मत हुँदै प्रतिनिधि सभामा गएको छ । त्यो प्रतिनिधि सभाबाट फर्किएर आउने हो की होइन ? प्रतिनिधि सभाले त्यसलाई टेबुल त गरेको छ । तर प्रतिनिधि सभामा मन्त्रीहरुको अभिव्यक्ति सुन्दा मन्त्रीहरुसँग भेट्दा त्यो विधेयक बनाउँदै गर्दा र सरोकारवाला मन्त्रीसँग भेट्दा विधेयकको बारेमा छलफल गर्दा र हामी सर्वदलीय रुपमा भेट्दा यो विधेयक गृह मन्त्रालयको हक अधिकार भित्र पर्दछ भन्नेकुरा आयो । राष्ट्रिय सभाको अध्यक्ष, प्रतिनिधि सभाको सभामुखलाई माथि राखेर प्रधानन्यायाधीशलाई तल राखेको विषयमा एउटा ठूलो भूकम्प नै गएको थियो ।’

‘त्यो विधेयक यहाँबाट सर्वसम्मत रुपमा गएको छ । राष्ट्रिय सभाबाट गएको विधेयक प्रतिनिधि सभाले तुहाउने काम गर्‍यो भने संघीय संसदको गरिमा के हुन्छ ? गीतमा एउटा श्लोक छ, कर्म गर्नु, फलको आशा नगर्नु । आज नेपाली जनताले त्यही कुरा आशा गर्नुपर्ने हो ? कर्म गरे, आफ्नो निर्वाचन क्षेत्रमा मत हाले, जिताए तर जनताले आशा गर्ने काम गर्ने हो की होइन । निर्वाचित भइसकेपछि जनतातिर फर्किनै सकेका छैनौँ । जनताले चाहेको कुरा खोजिरहेका छौँ की छैनौँ । सरकारले एउटा कानले सुन्ने र अर्को कानले उडाउने मात्रै काम गर्ने भए के हुन्छ । मिटरब्याजी पीडित आएका छन् । सरकारले कति रह्यो निर्णय र कानूनको काम । सरकारले गरेका निर्णय ६ महिनापछि उल्टिरहेको छ । सांसदले उठाउने मात्रै थलो हो यो । कार्यान्वयन गर्नुपर्छ की पर्दैन ?’

उहाँले सांसदहरुले संसदमा उठाएका कुराहरु सरकारले कार्यान्वयन गर्नुपर्ने बताउनु भयो ।