काठमाडौं । नेपाली काँग्रेसका नेता शेखर कोईरालाले आफूहरु सधैँ कम्युनिष्टहरुको पछि लागेर हिँड्ने हो ? भनि पार्टी नेतृत्वलाई प्रश्न गर्नुभएको छ ।
जिल्ला जिल्लामा पार्टीका साथीहरुले आफूलाई सो प्रश्न गर्ने गरेको उल्लेख गर्दै त्यसको जवाफ दिनेगरी पार्टीको महासमिति बैठकमा प्रश्तुत हुन पनि उहाँले नेताहरुलाई आग्रह गर्नुभयो । काँग्रेसको भोट प्रतिशत घट्दै गइरहेकाले पनि कम्युनिष्टहरुको पछि लागेर हिँड्ने अवस्थाको अन्त्य हुनेगरी सोमवार (भोलि)बाट शुरु हुने महासमिति बैठकमा गम्भिर रुपमा छलफल हुनपर्ने नेता कोईरालाको भनाई थियो । पार्टी महासमिति बैठकको अघिल्लो दिन आईतावर (आज) काठमाडौंमा आयोजित चियापान कार्यक्रममा बोल्दै उहाँले जनमत घटिरहेका बेला सरकारमा बसेका छौं भनेर काँग्रेसले खुशी हुनुपर्ने कुनै कारण नभएको पनि दोहोर्याउनु भयो ।
उहाँले महासमिति बैठकमा निर्वाचन प्रणालीमा सुधार ल्याउने विषयमा पनि महासमिति बैठकमा छलफल गर्नुपर्ने बताउनु भयो । विद्यमान निर्वाचन प्रणालीले कुनैपनि राजनीतिक दलको बहुमत आउन नसक्ने भएकाले त्यसमा सुधार गरेर अघि बढ्न काँग्रेसले सबै राजनीतिक दलसँग छलफलका लाग अग्रसरता दिनुपर्ने नेता कोईरालाको प्रश्ताव छ । उहाँले मुलुकको अर्थतन्त्र नाजुक अवस्थामा रहेको उल्लेख गर्दै रेमिटयान्स अर्थतन्त्रको विकल्प खोज्ने गरी निष्कर्षमा पुग्न पनि काँग्रेस महासमिति बैठकले ठोस निर्णय लिनुपर्ने बताउनु भयो ।
नेता कोईरालाले भन्नुभयो, ‘म जिल्लाजिल्ला घुम्दाखेरी साथहिरको एउटै प्रश्न हुन्छ–के हामी सधैं कम्युनिष्ट पछि लागेर हिँड्ने हो ? यो प्रश्न उठाइरहनु हुन्छ । हामीले एक्लै चुनाव कहिले लडने हो भनेर सोध्नुहुन्छ । यस पटकको दस्तावेजमा पनि एउटा कुरा के छ भने हामीले स्थानीय तहमा, प्रदेशमा र केन्द्रमा हामी सरकारमा छौं । बहुमतमा छौं चारैतिर । तर हाम्रो भोट प्रतिशत घट्दै गइरहेको अवस्था छ । त्यो किन घट्यो ? भन्ने कुरा अत्यन्त गम्भिर छ । आज यो ठिक लाग्ला हामीलाई । के भने सरकारमा छँदैछौं भनेर ठिक लाग्ला । तर भोलि हाम्रा सन्ततिहरुले हामीहरुलाई सोच्ने छन कि छैनन् भन्ने पनि हामीले बुझन जरुरी छ । भोट प्रतिशत ३४/३५ प्रतिशतबाट घटदैघटदै २७ प्रतिशतमा आएको छ क्यारे हाम्रो । साढे ७ प्रतिशत भोट घटेको छ । यो किन घटिराखेको छ भनेर हामीले विश्लेषण गरिराखेका छैनौं । हामी के मा रमाइराखेका छौ भने केन्द्रमा सरकारको नेतृत्व त हामीले गरेको छैन । तर १० वटा मन्त्रालय त हामीसित छ । यो कुरालाई तपाई महासमितिका साथीहरुले अत्यन्तै गम्भिर रुपले छलफल गर्नुहोला । र, महासमिति बैठकमा पनि यी कुराहरु राख्नु हुनेछ भन्ने विश्वास लिएको छु । दोस्रो कुरा हामीहरुको निर्वाचन प्रणाली नै यस्तो प्रकारको छ । यो निर्वाचन प्रणालीले कुनैपनि दललाई बहुमत दिन सक्दैन । बहुमत आउन पनि सक्दैन । एकातिर हामीहरु संसदीय प्रणाली भन्छौं । अर्कोतिर बहुमतको सरकार हामीले पाउन सक्दैनौं, हुन सक्दैन । के निर्वाचन प्रणालीमा हामीले केही परिवर्तन गर्नुपर्छ कि ? भन्नेतिर पनि हामी जानुपर्छ । मलाई के लाग्छ भने अब नेपाली काँग्रेसले पहल गर्नुपर्यो । अन्य राजनीति दलहरुसँग पनि बसेर । एमालेसित, माओवादीसित अनि अन्य दलहरुसँग पनि बसेर छलफल गर्नुपर्यो । निर्वाचन प्रणालीलाई कसरी अघि बढाउने भन्ने सन्दर्भमा नेपाली काँग्रेसकै अग्रसरतामा हुनु पर्छ भन्ने मलाई लाग्छ । देशको आर्थिक अवस्थाको कुरा गर्दा आज पनि प्रधानमन्त्रीजीले संसदमा भन्नुभयो–आर्थिक सूचकांकहरु राम्रो हुँदैछ भनेर । अर्थमन्त्रीजीले पनि भन्दै हुनुहुन्छ–आर्थिक सूचकांक राम्रो हुँदैछ भनेर । तर जनताले त्यो सूचकांक राम्रो छ कि छैन ? भन्ने कुराको अनुभुति जनताले पाउन सकेको मलाई लाग्दैन । देशका आर्थिक अवस्था नाजुक अवस्थाबाट गइराखेको छ भन्ने मलाई लाग्छ । हामीहरु रेमिट्यान्स बढेको बढ्यै छ । त्यसमा प्रशन्न, खुशी छों । सरकारमा बस्ने हामी सबै नेपालीहरु खुशी छौं । तर के रेमिटयान्स बढेर देशको समुन्नत नेपाल, समृद्ध नेपाल, विकसित नेपाल हामीहरुले बनाउन सक्छौं ? रेमिटयान्सको विकल्प अब हामीले खोज्न जरुरी छ । यसको निम्ति नेपाल भित्रै भएका विज्ञहरु र बाहिर भएर विज्ञहरुलाई समावेश गरिकन कसरी नेपाललाई विकसित गर्न सकिन्छ, कसरी नेपाललाई अगाडि बढाउन सकिन्छ भन्ने कुरामा अत्यन्त गम्भिर भएर सोच्नुपर्ने अवस्था आएको छ ।’
वरिष्ठ नेता कोईरालाले मुलुकको अर्थतन्त्रको सूचकांक राम्रा छ भनेर प्रधानमन्त्री स्वयंले भने पनि जनताले त्यस्तो अनुभुति गर्न नसकेको जिकिर समेत गर्नुभयो । —न्युज एजेन्सी नेपाल
