काठमाडौं । महिला उद्यमशीलताका लागि वडा ११ मा खेलौना र कुसन बनाउने तालिम सुरु भएको छ । आजबाट सुरु भएको तालिम २५ गतेसम्म चल्नेछ । तालिममा न्युन तथा मध्यम आय भएका महिला सहभागी छन् । वडा ११ को सहयोगमा साथी नेपालले तालिम आयोजना गरेको हो । यसका लागि भोटेवहाल महिला समूहले सहजकर्ताको काम गरेको छ ।
तालिम उद्घाटन गर्दै वडाध्यक्ष हीरालाल तण्डुकारले तालिमबाट प्राप्त गरेको ज्ञान र सीपलाई उत्पादनमा रुपान्तरण गर्ने अपेक्षा राखेको बताउनुभयो । ‘तालिम लिएपछि काम गर्ने पैसा भएन भने हामी शुन्य व्याजमा ऋण खोजी दिन्छौं । उत्पादन भएका सामानका लागि बजार खोजी गरिदिन्छौं । तपाईँहरु व्यवसायिक उद्यमी बन्ने इच्छा राख्नोस् ।’ वडाध्यक्ष तण्डुकारको भनाइ थियो ।
साथी नेपालका अध्यक्ष सरिता सापकोटाका अनुसार तालिममा खरायो, बसेको कुकुर, ठूलो कुकुर, लभ आकारको डल्लो र चारपाटे कुसन बनाउन सिकाइन्छ ।
